هەموو شتێك لەبارەی مووچەی مانگی چوارەوە لە SNNەوە بزانە

SNN-عەلی حەمە سەعید

بەرپرسێكی باڵا لە وەزارەتی دارایی و ئابوری حكومەتی هەرێم ئاشكرایكرد كە سبەی یەكشەممە ئامادەكردنی لیستی مووچەی مانگی چوار لەلایەن وەزارەت و دەستەكانەوە كۆتایی دێت و ڕەوانەی وەزارەتی دارایی دەكرێت هاوكات وردەكاری ڕۆژی ناردنی پارە لەلایەن بەغداوە ئاشكرا دەكات

بەگوێرەی ئەو زانیارییانەی كە لە بەرپرسێكی باڵای وەزارەتی دارایی هەرێم بە SNNدراون ئەوە خراوەتەڕوو، لەهەفتەی ڕابردووەوە ئامادەكردنی لیستی مووچەی فەرمانبەران و خانەنشینانی هەرێم دەستپێكردووە و سبەی یەك شەممە ئامادەكردنەكە كۆتایی دێت و هەرسبەی یان ڕۆژی دووشەممە لیستەكان ئاراستەی وەزارەتی دارایی هەرێم دەكرێت.

ئاماژەی بەوەشكرد، لەگەڵ گەیشتنی لیستەكان لە ڕۆژی دووشەممە یان سێ‌شەممە دەستدەكرێت بە وردبینیكردنی لیستەكان، هاوكات هەر لەسەر بنەمای ئەو لیستانەی كە ڕەوانەی وەزارەتی دارایی كراون، میزان موراجەعە ئامادە دەكرێت و پاشان لە كۆتایی هەفتە یاخود سەرەتای هەفتەی داهاتوو شاندێكی تەكنیكی وەزارەتی دارایی هەرێم لیستی مووچە و میزان موراجەعە لەگەڵ خۆیان دەبەنە بەغدا.

بەرپرسەباڵاكەی وەزارەتی دارایی ئەوەشی بۆSNN ڕوونكردەوە، دوای ئەوەی لیستی مووچە ڕەوانەی بەغدا كرا، دەبێت لەوەزارەتی دارایی هەرێمیش وردبینی بۆ بكرێت، بەڵام بەهۆی ئەوەی لیستی مووچەی مانگی چوار هاوشێوەی لیستی مووچەی مانگی ڕابردووە و بڕی 955 ملیار داواكراوە بۆ مووچە، بۆیە كاتی زۆری ناوێت بۆ وردبینیكردن، هاوكات لەدوای 25 ی مانگ كە كۆتایی دێت بەدابەشكردنی مووچەی وەزارەتەكانی عێراق دەستدەكرێت بە تەمویلكردنی مووچەی فەرمانبەرانی هەرێم و بە ئەگەری زۆر تا كۆتایی ئەم مانگە دەستدەكرێت بە دابەشكردنی مووچەی مانگی چواری فەرمانبەرانی هەرێم.