گفتوگۆی نێوان ئێران و ئەمریکا بەهای تمەنی بەرزکردەوە

SNN-

گەڕی دووەمی گفتوگۆی ئێران و ئەمریکا کاریگەری ئەرێنی لەسەر بازاڕەکانی تاران و بەهای تمەن هەبووە، هاوکات ماڵپەری نەڤەسانی تایبەت بە نرخی دراوەکان لە بازاڕی نێوخۆی ئێران دەڵێت، ئەمرۆ یەک دۆلار بە 83 هەزار تمەن مامەڵەی پێوەدەکرێت.

دوێنێ شەممە پێش ئەوەی دانوستاندنەکانی نێوان ئێران و ئەمریکا لە رۆما دەستپێبکات، یەک دۆلار بە 85 هەزار تمەن مامەڵەی پێوەدەکرا.

ئەمەش لە کاتێکدایە لە دوای گفتوگۆکەی ئێران و ئەمریکا، عەباس عێراقچی، وەزیری دەرەوەی ئێران رایگەیاند، “گفتوگۆیەکی بنیاتنەرانەمانلەگەڵ ئەمریکا کرد.”

ئاماژەی بەوەشکردووە، “لە بەردەوامیی کۆبوونەوەکەی پێشوودا، ئەم جارەش کۆبوونەوەیەکی باش بوو و دەتوانم بڵێم کە دانوستاندنەکە بەرەو پێشەوە هەنگاو دەنێت.”

پێش دەستپێکی یەکەم گەڕی گفتوگۆی نێوان ئەمریکا و ئێران، نرخی یەک دۆلار بەرامبەر بە تمەن بەرزبووەوە بۆ نزیکەی 106 هەزار تمەن،
بەوپێیەش لە ماوەی 8 رۆژی رابردوودا بەهای تمەن بەرامبەر بە دۆلار نزیکەی 23 هەزار تمەن و زیاتر لە 21٪ بەرزبوونەوەی بەخۆوە بینیوە.