بەرپرسێكی وەزارەتی دارایی هەرێم: بۆ ناردنی پارە پێویست بە واژۆی تەیف سامی ناكات

SNN-عەلی حەمە سەعید
بەرپرسێكی وەزارەتی دارایی هەرێم ئاماژە بەوەدەكات هیچ گرفتێك لەسەر ناردنی پارەی مووچەی فەرمانبەرانی هەرێم بۆ مانگی چوار نییە و ئەمڕۆ لیستەكە پەسەندكراوە، هاوكات لەبری وەزیری دارایی عێراق، بەڕێوەبەری گشتی ژمێریاری وەزارەتی دارایی عێراق واژۆ لەسەر ناردنی پارە بۆ هەرێم دەكات.

بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوەخراوەتەڕوو، ناردنی پارەی مووچەی مانگی چواری فەرمانبەرانی هەرێم هیچ گرفتێكی نییە، چونكە ئەو لیستەی بۆمانگی چوار ڕەوانە كراوە پەسەندكراوە و تەنها ئەوەماوە كە واژۆ لەسەر تەمویلكردنی پارە بكرێت بۆ هەرێم.

ئاماژەی بەوەشكرد، بۆ ناردنی پارە پێویست بە واژۆی ( تەیف سامی) وەزیری دارایی عێراق ناكات، چونكە ناوبراو لە دوو مانگی ڕابردوودا ئەو ئەركەی لەسەر شانی خۆی لابردووە و واژۆكردنی ناردنی پارەی سپاردووە بە بە بڕێوەبەری ژمێریاری وەزارەتی دارایی عێراق.

ئەو بەرپرسەی وەزارەتی دارایی ئەوەشی خستەڕوو، ئەگەر سبەی دەستنەكرێت بە ڕێكارەكانی تەمویلكردنی مووچە، ئەوا ئەو بابەتە دەكەوێتە سەرەتای هەفتەی داهاتوو چونكە ڕۆژی پێنج شەممە 1/5/2025 لەسەرتاسەری عێراق و هەرێمی كوردستان پشووی فەرمییە و ڕۆژی یەك شەممە دەستدەكرێتەوە بە دەوامی فەرمی.