بە پارێزگاكردنی هەڵەبجە نرخی زەوی و خانوو بە ڕێژەی لە%20 بەرزكردووەتەوە

SNN-عەلی حەمە سەعید

بەوتەی خاوەن نوسینگەكانی كڕین و فرۆشتنی زەوی و خانوو لە هەڵەبجەن دوای پەسەندكردنی پرۆژەیاسای بە پارێزگاكردنی هەڵەبجە ماوەی چەند ڕۆژێكە بازاڕی كڕین و فرۆشتنی زەوی و خانوو لە هەڵەبجە جموجوڵی زیاتری بە خۆیەوە بینویە و نرخی زەوی و خانوو بەڕێژەی لە %20 بەرز بووەتەوە.

وەرزێر محەمەد، یەكێك لە خاوەن نوسینگەكانی كڕین و فرۆشتنی خانوو زەوی لە هەڵەبجە بە SNNی ڕاگەیاند: دوای ئەوەی پرۆژەیاسای بە پارێزگاكردنی هەڵەبجە لە پەرلەمانی عێراق دەنگی لەسەردرا، ڕاستەوخۆ كاریگەری هەبوو لە زیادكردنی جموجوڵی بازاڕی كڕین و فرۆشتنی زەوی و خانوو لە سنووری پارێزگای هەڵەبجە بەتایبەت لەناو سەنتەری هەڵەبجە.

ئاماژەی بەوەشكرد، بەدڵنیاییەوە لە دوای پەسەندكردنی پرۆژەیاسای بە پارێزگاكردنی هەڵەبجە نرخی زەوی و خانوو بەرزبووەتەوە، بەتایبەت نرخی زەوی زیاتر بەرز بووەتەوە بەجۆرێك ئەگەر پێشتر زەوییەكی 200 مەتری یەك دەفتەر دۆلاری كردبێت ئێستا هەمان زەوی بە زیاد لە 120 وەرەقە كڕین و فرۆشتنی پێوە دەكرێت و لەهەندێك ناوچەش زیاتر بەو ڕێژەیە بەرزبووەتەوە.

ئەو خاوەن نوسینگەی كڕین و فرۆشتنی خانوو زەوی لە هەڵەبجە ئەوەشی ڕوونكردەوە، دوای واژووكردنی یاساكە لەیلان سەرۆككۆمار و بڵاوكردنەوەی لە ڕۆژنامەی وەقایع و بە فەرمی كەوتنە بواری جێبەجێكردنەوە، ئەوكات زیاتر كاریگەری لەسەر بەرزبوونەوەی نرخی زەوی و خانوو دەبێت لە پارێزگای هەڵەبجە، بەڵام لەهەموو حاڵەتەكاندا هێشتا نرخی زەوی و خانوو لە سنووری هەڵەبجە زۆر هەرزانترە بەراورد بە شارەكانی دیكەی هەرێم.