سەرۆكی كۆمەڵەی كێڵگە پەروەرییەكان: تا دوو ساڵی دیكە كەرتی پەلەوەر بەتەواوی لەناو دەچێت

SNN-عەلی حەمە سەعید

سەرۆكی كۆمەڵەی كێڵگە پەلەوەریەكانی هەرێم ئاماژە بەوەدەكات، لە دوای جەژنی رەمەزانەوە كێڵگە پەلەوەریەكان بە بڕی زیاد لە 10 ملیار دینار زیانیان پێگەشتووە، جەختیش دەكاتەوە كە ئەگەر ئەم سیاسەتەی حكومەتی هەرێم بەدەوام بێت لەدوو ساڵی داهاتوودا كەرتی پەلەوەر بەتەواوی لەناو دەچێت.

نازم عەبدوڵا، سەرۆكی كۆمەڵەی كێڵگە پەلەوەریەكانی هەرێم بەSNNی ڕاگەیاند: لەدوای جەژنی ڕەمەزانەوە سەرجەم كیڵگە پەلەوەرییەكان لە زیاندان، بەجۆرێك زیاد لە 10 ملیار دینار زیانیان پێگەیشتووە، هۆكاری زیانەكەش نەبونی پلانی حكومەتی هەرێم و پشتیوانی نەكردنی لایەنە پەیوەندیدارەكانە لە چاودێری نەكردنی ئەو پێداویستیانەی بەكاری دەهێنین.

ئاماژەی بەوەشكرد، بەهۆی رێگریكردن لەلایەن بازگەكانی حكومەتی عێراق كە ناهێڵن مریشك برواتە خوارووی عێراق، زیانێكی زۆری بە كێڵگە پەلەوەرییەكان گەیاندووە، هاوكات زۆرجار ئەو جووجك و هێلکەی تروكاندنانەی هاوردە دەكرێن كوالیتیان زۆر خراپە و بووەتە هۆی زیانگەیاندن بە خاوەن كێڵگەكان.

سەرۆكی كۆمەڵەی كێڵگە پەلەوەریەكانی هەرێم ئەوەشی ڕوونكردەوە، ئەگەر ئەم پشتگوێخستنەی حكومەتی هەرێم بەردەوامی هەبێت، ئەوا كەرتی بەرهەم هێنانی پەلەوەر تەمەنی ناگاتە دوو ساڵی دیكە و لەناو دەچێت، ئەمەش دەبێت هۆی لە ناوچونی كەرتێكی گرنگی ئاسایشی خۆراك و دروستبونی بێكاری زیاتر.