SNN-
حکومەتی بەریتانیا پلانی داناوە لەمەودوا پرۆسەی پێدانی ڤیزا بۆ ئەو وڵات و ناوچانە قورس بکات کە خەڵکەکانیان زۆر داوای مافی پەنابەری لە بەریتانیا دەکەن.
داتاکانی بەریتانیا ئەوە دەردەخەن، لەنێو 108 هەزار داواکاریی پەنابەریدا کە ساڵی 2024 پێشکێش کراون، 16 هەزار کەسیان بە ڤیزای خوێندن چوونەتە بەریتانیا، دواتر داوای مافی پەنابەرییان کردووە.
بەم هۆکارە، هەفتەی داهاتوو حکومەتی بەریتانیا پلانێکی نوێی بۆ کۆچبەری ئاشکرا دەکات، تێیدا روونی دەکاتەوە چۆن دەیەوێت وابکات کەمتر کۆچبەر بچنە بەریتانیا.
ئەمەش دوای ئەوە هات، حکومەتی ئێستای بەریتانیا، کە بەدەست پارتی کرێکارانەوەیە، بەهۆی بەرز مانەوەی رێژەی هاتنی کۆچبەران لەژێر گوشاری گەورەیهاوڵاتیان و دەنگدەراندایە.
ئەمەش واتا، حکومەتی بەریتانیا دەیەوێت وابکات لەمەودوا، بۆ نموونە ئەگەر “لە عێراقەوە داواکاریی پەنابەری زۆربن، چیدیکە بە ئاسانی ڤیزا نەدرێتە ئەوانەی لە عێراق و باشووری کوردستانەوە دەیانەوێت بە ڤیزا بچنە وڵاتەکەیان.”
شانشینی یەکگرتووی بەریتانیا، ئەم وڵاتە ناسراوە بە شانشینی یەکگرتووی بەریتانیا گەورە و ئایرلەندای باکوور، بە گشتی پێی دەوترێت شانشینی یەکگرتوو یاخود بەریتانیا، وڵاتێکی هەڵکەوتووی باکووری ڕۆژئاوای ئەورووپایە، بەریتانیا لە کەنارەکانی باکووری ڕۆژئاوای ئەورووپایە کە وڵاتێکی تەواو دابڕاوە لە وڵاتانی چواردەوری و لە هەر چوار لاوە بە ئاو دەورەدراوە کە سنووری ئاوی لەگەڵ زەریای ئەتڵەسی هەیە، تەنها یەک دراوسێی هەیە کە بە وشکانی پێی بگات ئەویش وڵاتی کۆماری ئایرلەندایە.
