لەبارەی خانەنشینكردنی فەرمانبەران پێش تەمەنی خانەنشین بوونیان روونكردنەوە دەدرێت

SNN-عەلی حەمە سەعید
وتەبێژی یەكێتی خانەنشینانی كوردستان ئاماژە بەوەدەكات، سەرجەم ئەو فەرمانبەرانەی كە بە یاسای یەكگرتووی خانەنشینی عێراق خانەنشینكراون، بەڕێكاری یاسایی خۆیان خانەنشین بوون و هیچ فەرمانبەرێك لە تەمەنی 59 ساڵی خانەنیشن نەبووە، ئەوەش ڕەتدەكەینەوە هەزاران فەرمانبەر لە تەمەنی 59 ساڵی خانەنشین بوون.

سادق شێخ عوسمان، وتەبێژی یەكێتی خانەنشینانی كوردستان بەSNNی راگەیاند، ئەو 31 هەزار فەرمانبەرەی كە لەسەرەتای ئەمساڵەوە بە گوێرەی یاسای خانەنشینی یەكگرتوو خانەنشین بوون، سەرجەم رێنماییەكانی خانەنشین بوونیان تێدا بووە بەتایبەت لەرووی تەواوكردنی تەمەنی یاسایی خۆیان كە 60 ساڵی تەواوە.

ئاماژەی بەوەشكرد، هەر فەرمانبەرێك كە خانەنشین دەبێت، مەرجە 60 ساڵی تەمەنی تەواو كردبێت و بەرەو تەمەنی 61 ساڵی بڕوات نەك تەمەنی 59 ساڵی تەواو كردبێت و بەرەو 60 ساڵی بڕوات، بۆیە هەموو ئەو فەرمانبەرانەی خانەنشینكراون تەمەنی 60 ساڵییان تەواو كردووە و بەرەو 61 ساڵ ڕۆشتوون، نەك 59 ساڵیان تەواوكردبێت و بەرەو 60 ساڵ ڕۆشتبن.

وتەكانی وتەبێژی یەكێتی خانەنشینانی هەرێم لەكاتێكدایە كە، لەهەندێك لە دەزگاكانی ڕاگەیاندن ئەوە بلاوكراوەتەوە گوایە هەزاران فەرمانبەر بە نایاسایی خانەنشین بوون و تەمەنیان نەگەیشتووەتە 60 ساڵی تەواو خانەنینكراون، ئەمەش كاردانەوەی بەشێك لەو خانەنشینانەی بەدوای خۆیدا هێناوە كە لەمساڵدا خانەنشین بوون.