لەبارەی ئەو فەرمانبەرانی مووچەكەیان دوو ملیۆن دینار زیاترە بڕیارێكی نوێ‌ دەركرا

SNN-عەلی حەمەسەعید

بەڕێوەبەری پسوڵەی خۆراكی پارێزگای هەڵەبجە ئاماژەبەوەدەكات، وەزارەتی بازرگانیی عێراق بڕیاریداوە هەر فەرمانبەرێك مووچەكەی لە دوو ملیۆن دینار زیاتربێت بەشەخۆراكی مانگانەی دەبڕدرێت، لەكاتێكدا پێشتر هەر فەرمانبەرێك مووچەكەی یەك ملیۆن و 500 هەزار دینار بۆ سەرەوە بووایە بەشە خۆراكەی دەبڕدرا.

مەریوان هادی، بەڕێوەبەری پسوڵەی خۆراكی پارێزگای هەڵەبجە بە SNNی ڕاگەیاند: وەزارەتی بازرگانیی عێراق بڕیاریداوە كە هەر فەرمانبەرێك مووچەكەی لە دوو ملیۆن دینار كەمتر بێت، بەشەخۆراكی نابڕێت، بەڵام بەپێی بڕیاری ئەنجوومەنی وەزیران، ئەگەر مووچەكەی لە سەرووی دوو ملیۆن دینار بێت بەشە خۆراكەكەی دەبڕێت.

ئاماژەی بەوەشكرد، پێشتر هەر فەرمانێك مووچەكەی یەك ملیۆن و 500 هەزار دینار بە سەرەوە بووایە بەشە خۆراكی دەبڕدرا، بەڵام دواتر دەستكاری ئەو بڕە كراوە و زیاد كراوە ئێستا ئەوەی مووچەكەی لە دوو ملیۆن دینار زیاتر بێت، بەشەخۆراكەكەی دەبڕێت.

بەشەخۆراكی مانگانە بۆ هەر كەسێك ئەمانەیە؛ 3 كیلۆ برنج، 9 كیلۆ ئارد، كیلۆیەك شەكر، لیترێك رۆنی شل و  نیو كیلۆ لە جۆرەكانی پاقلەمەنی، نیو كیلۆ دۆشاوی تەماتە.