وەزارەتی دارایی عێراق داوای لیبڕینی لە%1ی مووچەی بنەڕەتی فەرمانبەرانی هەرێم دەكات

SNN-عەلی حەمە سەعید
وەزارەتی دارایی عێراق بە نوسراوێك كە ئاراستەی وەزارەتی دارایی هەرێمی كردووە داوا كراوە بۆ مانگی پێنج لە ئامادەكردنی لیستی مووچە، بڕی لە%1 لە مووچەی بنەڕەتی سەرجەم فەرمانبەرانی میلاك و گرێبەستی وەزارەتە جیاوازەكانی هەرێم ببڕێت.

بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوە خراوەتەڕوو، داواكارییەكەی وەزارەتی دارایی عێراق بە لیبڕینی لە %1ی ی مووچەی فەرمانبەرانی میلاك و گرێبەستی هەرێم شەوی رابردوو بە دەستمان گەیشتووە و ئێمە لە ئامادەكردنی لیستی مووچە ئەو لێبڕینە جێبەجێی دەكەین.

ئاماژەی بەوەشكرد، ئەو لێبڕینە تەنها بۆ مانگی پێنج داواكراوە و ڕوونەكراوەتەوە هۆكاری لێبڕینی ئەو بڕە پارەیە لە مووچەی بنەڕەتی فەرمانبەرانی میلاك و گرێبەست بۆچی دەگەڕێتەوە بەڵام تەنها ئاماژە بەوەكراوە كە ئەم لێبڕینە بۆ مانگی پێنج جێبەجێی بكرێت.

ئەو لێبڕینەی مووچە لەكاتێكدایە كە پێشتریش لە بەهەمان شێوە لە %1ی مووچە بەناوی هاوكاریكردنی هاووڵاتیان و لوبنان و فەلەستین لە مووچەی فەرمانبەرانی عێراق بڕدرا، بەڵام دواتر وەزارەتی دارایی عێراق داوای لە فەرمانبەرانكرد دەتوانن داواكاری پێشكەش بكەن بۆ گەڕانەوەی ئەو بڕە پارەیەی لێیان بڕدراوە.