سیستەمی پەیرۆڵ بۆ ئامادەكردنی لیستی مووچە كارا كراو لەماوەی 48 كاتژمێردا لیست ڕەوانەی بەغدا دەكرێت

SNN-عەلی حەمە سەعید
دوای ئەوەی درەنگانێكی شەوی ڕابردوو سیستەمی پەیرۆڵ بۆ ئامادەكردنی لیستی مووچەی مانگی پێنج كاراكرا، بەرپرسێكی وەزارەتی دارایی هەرێم ئاماژە بەوەدەكات دەتوانین لەماوەی 24 تا 48 كاتژمێر لیستی مووچە ڕەوانەی بەغدا بكەین

بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوە خراوەتەڕوو، لەشەوی ڕابردووەوە سیستەمی پەیرۆڵ بۆ ئامادەكردنی لیستی مووچەی مانگی پێنج كاراكراوە، هەرچەندە ئەمڕۆ بۆماوەی چەند كاتژمێرێك سیستەمەكە لەلایەن بەغداوە ڕاگیرا بەڵام دووبارە كاراكرایەوە.

ئاماژەی بەوەشكرد، دوای كاراكردنی سیستەمی پەیرۆڵ ئامادەكردنی لیستی مووچە كاتێكی زۆری ناوێت و دەتواندرێت لەماوەی 24 تا 48 كاتژمێر لیستەكە ئامادە بكرێت و ڕەوانەی بەغدا بكرێت، چونكە هەمان ئەو لیستەیە كە لەمانگەكانی ڕابردوو ئامادەكراوە و تەنها چەند گۆڕانكارییەكی كەمی تێدا دەكرێت.

ئەو بەرپرسەی وەزارەتی دارایی هەرێم ئەوەشی خستەڕوو، لەچەند ڕۆژی ڕابردوو میزان موراجەعەی مانگی چوار نیردراوە بۆ بەغدا، بەڵام تا ئەمڕۆ نە داهاتی نانەوتی و نە لیستی مووچەی مانگی پێنج ڕەوانەی بەغدا نەكراوە، ئەگەر هەیە تا كۆتایی ئەم هەفتەیە ئەو بابەتانە یەكلایی بكرێنەوە.