سبەینێ خولی پێنجەمی دانوستانەکانی ئەمریکا و ئێران دەستپێدەکات

SNN-

ئێران رەزامەندی نیشاندا بۆ بەشداریكردن لە خولی پێنجەمی دانوستانەكان كە بڕیارە سبەینێ لە رۆما بەرێوەبچێت.

ئیسماعیل بەقائیی، وتەبێژی وەزارەتی دەرەوەی ئێران رایگەیاند، لەسەر پێشنیاری عوممان و ئەو راوێژانەی كە بەڕێوەی دەبات بۆ بەڕێوەچوونی خوولی نوێی دانوستانەكان لە رۆمای پایتەختی ئیتالیا، بەشداری دەكەن.

راشیگەیاند، وەفدی دانوستانكاری ئێران پێداگری لە هەڵوێستی خۆی دەكات سەبارەت بە پیتاندنی ئاشتیانەی یۆرانیۆم و هەڵگرتنی گەمارۆكان لە هەر ئەگەرێكدا.

پێشتر عەباس عراقچی، وەزیری دەرەوەی ئێران رایگەیاندبوو، هێشتا بڕیاریان نەداوە بەشداری لە خولی داهاتووی دانوستانەكاندا بكەن یاخود نا، بەوتەی خۆی ئەمریكا هاوكاری گفتوگۆكان ناكات و جار بە جار داواكاری و مەرجی زیادەیان هەیە.