“تاران ئامادەیە بۆ پشکنینی زیاتری دامەزراوە ئەتۆمییەکانی تا ئاستەنگییەکانی بەردەم دانوستانەکان نەمێنن”
SNN-
وەزیری دەرەوەی ئێران رایگەیاند: بۆ گەیشتن بە رێککەوتن لەگەڵ واشنتن دۆزینەوەی رێگایەک کارێکی ئەستەم نییە، ئێستا کاتی ئەوە هاتوە بڕیارێک بدەن.
پێش بەڕێکەوتنی بۆ رۆما پایتەختی ئیتاڵیا بەمەبەستی ئەنجامدانی دانوستانەکان، عەباس عراقچی، وەزیری دەرەوەی ئێران لەڕێگەی تۆڕی کۆمەڵایەتی (X)ـوە لە پەیامێکدا دەڵێت: لە گەڕی پێنجەمی دانوستانەکانی ئەتۆمی وڵاتەكەی لەگەڵ ئەمەریکا، کاتی ئەوە هاتوە بڕیار بدەن، بەڵام ئەگەر ویلایەتە یەكگرتوەكان رێگری لە پیتاندنی یۆرانیۆمی وڵاتەکەی بکات، ناگەن بەرێككەوتن.
دەشڵێت:”بۆ گەیشتن بە رێککەوتن لەگەڵ واشنتن دۆزینەوەی رێگایەک کارێکی قورس نییە، هەربۆیە تاران ئامادەیە بۆ پشکنینی زیاتری دامەزراوە ئەتۆمییەکانی ئەوەش بەمەبەستی دەربازبون لە ئاستەنگەکانی دانوستانەکانی نێوان ئەمەریکا و وڵاتەكەی.
دانوستانی نێوان تاران و واشنتۆن لەسەر بەرنامە ئەتۆمییەكەی ئێران، لە رۆژی (12ـی نیسانی 2025)ـوە دەستیپێكردوە و تا ئێستا چوار گەڕی دانوستان بەنێوەندگیری عوممان لە نێوان ئەو دو وڵاتە بەڕێوە چوە، بڕیار وایە ئەمڕۆ هەینی گەڕی پێنجەم لە رۆما ئەنجام بدرێت.
