بەڵگە: لە دادگای فیدراڵی سكاڵا دژی گرێبەستەكانی هەرێم لەبارەی غازەوە تۆماركرا
گرێبەستەکەی مەسرور بارزانی
SNN-عەلی حەمە سەعید
دوای ئەوەی لە دادگای بازرگانی سكاڵا لەسەر ئەو گرێبەستانە تۆماركرا كە سەرۆكی حكومەتی هەرێم لەگەڵ چەند كۆمپانیایەكی ئەمەریكی لەبواری غازی سروشتی واژووی كردبوون، بەهەمان شێوەیەش لەلایەن ئەندامێكی لیژنەی یاسایی پەرلەمانی عێراقەوە لەدادگای فیدراڵی سكاڵای یاسایی لەسەر هەمان گرێبەست تۆماركردووە.
بەگوێرەی نوسراوێك كە لەلایەن (ڕائید حەمدان مالكی) ئەندامی لیژنەی یاسایی لە پەرلەمانی عێراق، ئاراستەی دادگای فیدراڵی عێراق كراوە، تیایدا سكاڵای تۆماركردووە دژی دوو گرێبەستە غازییەكەی هەرێم لەگەڵ كۆمپانیا ئەمەریكییەكان.
ئەو ئەندامەی لیژنەی یاسایی لە پەرلەمانی عێراق لە سكاڵاكەیدا داوای لە دادگای فیدراڵی كردووە دادگا فەرمانێك دەربكات بە ڕاگرتنی ڕێكارەكانی هەردوو گرێبەستەكە ئەوەش بە پشت بەستن بە مادەكانی ١ و ۲۷ و ۱۱۰ و ۱۱۱و ۱۱۲ ی دەستوری عێراق.
ئەوەش لەكاتێكدایە كە هەر دوێنێ حكومەتی عێراق لە دادگای بازرگانی كە تایبەت بە یەكلاكردنەوەی ئەو دۆسیانەی كە ڕەهەندی ئابوری و داراییان هەیە، سكاڵایان لە دژی حكومەتی هەرێم تۆماركرد لەبارەی ئەو گرێبەستانەی كە سەرۆكی حكومەت لە واشنتن لەبارەی غازی هەرێمی كوردستانەوە لەگەڵ چەند كۆمپانیایەكی ئەمەریكای واژوویان لەسەر كردبوو.
