شارەوانی سلێمانی هەڵمەتێکی هاوبەشی بۆ رێگریکردن لە سەربڕینی ئاژەڵ لەسەر شەقام و کۆڵانەکان ئەنجامدا

SNN-

هەڵمەتێکی هاوبەش بۆ رێگریکردن لە سەربڕینی ئاژەڵ لەسەر شەقام و کۆڵانەکاندا ئەنجامدرا، هەروەها شارەوانی سلێمانی داوا لە هاووڵاتییان دەکات پابەندی بڕیارەکانی قایمقامییەت و شارەوانی ببن و خۆیان لە تاوانەکردن و رێکاری یاسایی بپارێزن.

سەرۆکایەتی شارەوانی سلێمانی بڵاویکردەوە، بەرەبەیانی ئەمڕۆ هەینی کە هاوکاتە لەگەڵ یەکەم رۆژی جەژنی قوربانی پیرۆز، هەردوو بەشی خزمەتگوزاریی و زیادەڕەویی سەرۆکایەتیی شارەوانیی بە هەماهەنگی لیژنەکانی قایمقامیەت و هێزەکانی ناوخۆ، هەڵمەتێکی چڕ بۆ رێگریکردن لە سەربڕینی ئاژەڵ لەسەر شەقام و کۆڵانەکاندا بەمەبەستی ئەنجامدانی قوربانی ئەنجامدرا.

ئاماژەی بەوەشکرد، ئەنجامدانی ئەم هەڵمەتە لە کاتێکدایە پێشوەختە هاووڵاتییان ئاگادارکراونەتەوە کە سەربڕینی ئاژەڵ لەسەر شەقام و کۆڵان و ناوماڵەکاندا بە هەموو شێوەیەک رێگەپێدراو نییە، ئەوەش بە مەبەستی پاراستنی ژینگەی شار لە بڵاوبوونەوەی پاشماوە و بۆنی ناخۆش هەروەها گرتنەبەری رێکاری تەندروستی بۆ پاراستنی تەندروستی هاووڵاتییان دژی بڵاوبوونەوەی پەتای خوێنبەربوون.

شارەوانی سلێمانی دەشڵێت: بە درێژایی رۆژانی جەژن ئەم جۆرە هەڵمەتانە لەلایەن تیمەکانی سەرۆکایەتیی شارەوانییەوە بەردەوامی دەبێت، هەروەها شارەوانی سلێمانی داوا لە هاووڵاتییان و خێردۆستان دەکات پابەندی بڕیارەکانی قایمقامییەت و شارەوانی ببن و خۆیان لە تاوانەکردن و رێکاری یاسایی بپارێزن، بۆ پاراستنی ژینگەی شارەکەمان و تەندروستیی هەموو هاووڵاتییان خۆیان لە ئەنجامدانی ئەو کارە بەدووربگرن، ئەو ئاژەڵانەشی دایانناوە بۆ قوربانیی لەکوشتارگەکان لەژێر سەرپەرشتی تیمەکانی تەندروستی و دکتۆرەکانی ڤێرتەرنەری سەرببڕدرێن.