“ئەمساڵ 400 هەزار تۆن گەنم لە جوتیاران وەردەگیرێت”
SNN-عەلی حەمەسەعید
بەڕێوەبەری گشتیی بازرگانی و لە وەزارەتی بازرگانی و پیشەسازیی حكوومەتی هەرێم ئاماژە بەوەدەكات لە رۆژی سێ شەممەی داهاتووەوە دەرگای سایلۆكانی كوردستان دەكرێنەوە و دەستدەكرێت بە وەرگرتنی گەنم لە جووتیارانی هەرێم، ئاشكراشیدەكات ئەمساڵ 400 هەزار تۆن گەنم لە جوتیاران وەردەگیرێت.
نەوزاد شێخ كامیل، بەڕێوەبەری گشتیی لە وەزارەتی بازرگانی و پیشەسازیی حكوومەتی هەرێم بە SNNی ڕاگەیاند: هەموو ئامادەكارییەك كراوە بۆ ئەوەی لە ڕۆژی سێ شەممە 10/6/2025 دەرگای سایلۆكانی هەرێم بەڕووی جوتیاراندا بكرێنەوە بۆ ئەوەی دەستبكرێت بە وەرگرتنی گەنم لە جوتیارانی هەرێمی كوردستان.
ئاماژەی بەوەشكرد، جگە لەو سایلۆیانەی كە لە ساڵانی ڕابردوودا گەنمی جوتیارانی هەرێمیان وەرگرتووە، بۆ ئەمساڵ چەند سایلۆیەكی نوێش دەستدەكەن بە وەرگرتنی گەنمی جوتیاران وەك سایلۆكانی قوشتەپە، گەرمیان و ڕوڤیا، كە ئەوەش هاوكارێكی باش دەبێت بۆ جوتیاران و كارئاسانی زیاتریان بۆ دەكات لە ڕادەستكردنی بەرهەمی گەنمەكانیان.
بەڕێوەبەری گشتی لە وەزارەتی بازرگانی و پیشەسازیی حكوومەتی هەرێم ئەوەشی خستەڕوو، بۆ ئەمساڵ، بڕی 400 هەزار تۆن گەنمی جووتیارانی كوردستان وەردەگرین، بەڵام لەگەڵ حكومەتی عێراق لە گفتوگۆداین بۆ ئەوەی هاوشێوەی جووتیارانی عێراق، گەنم لە جووتیارانی هەرێم وەربگیرێت، بەپێی ئەو پلانەی بۆ خۆیان دایانناوە، چونكە ئەمساڵ بەهۆی كەمبارانییەوە بەرهەمی گەنم وەك ساڵانی ڕابردوو نەبووە لە هەندێك ناوچە.
