پرسی مووچە بە نێودەوڵەتی دەکەین

SNN

ئەمڕۆ 6ـی حوزه‌یرانی 2025، هۆشیار زێباری، ئەندامی دەستەی کارگێڕی مەکتەبی سیاسیی پارتی دیموکراتی کوردستان، لەمیانەی چاوپێکەوتنێکدا لەگەڵ کەناڵی سکای نیوز عەرەبی، ڕایگەیاند، پەیوەندیی نێوان حکومەتی هەرێمی کوردستان و فیدراڵ خراپە، بە تایبەت دوای بڕیاری ڕاگرتنی مووچەی مووچەخۆرانی هەرێم.

زێباری ئاماژەی بەوەشکرد، بڕیاری ڕاگرتی مووچەی مووچەخۆرانی هەرێمی کوردستان، بەر لە هاتنی جەژنی قوربان، بڕیارێکی تەواو سیاسی، ستەمکارانەیە و لە کاتێکی خراپ دایە.

ڕاشیگەیاند، حکومەتی عێراق بەم بڕیارەی فەرمانبەرانی هەرێمی کوردستانی پەراوێز خستووە و هەنگاوێکە بۆ زەوتکردنی مافە سروشتی و دەستوورییەکانیان، هاوکات ئەم هەنگاوە ئامانجی لاوازکردنی هەرێم و ئیدارەی فیدراڵی دەستوورییە کە لە دوای ساڵی ٢٠٠٣ لە عێراقدا هەبووە.

ئاماژەی بەوەشکرد، هەرێم پشکی لەسەدا ١٢ی بودجەی هەیە، بەڵام حکومەتی ناوەندی پابەندی دەستوور و یاسا نین و مافە دەستوورییەکانی هەرێمی کوردستان و فەرمانبەرانی پێشێل کردووە، هەر ئەمەش هۆکاری دروستبوونی قەیرانی ئابووریی لە هەرێم بووە.

جەختی لەوەش کردەوە، بڕیارەکەی حکوومەتی عێراق پێچەوانەی دەستوور و فیدراڵییەتە و، ئامانج لێی لاوازکردنی هەرێمی کوردستانە.

ڕوونیشیکردەوە، هەرێمی کوردستانی عێراق “پەیوەندییەکی بەرفراوان و بەهێزی لەگەڵ ئەمەریکا، وڵاتانی یەکێتی ئەوروپا، وڵاتانی عەرەبی، وڵاتانی ئەنجوومەنی هاریکاری کەنداو، تورکیا، ئێران، و نەتەوە یەکگرتووەکان هەیە. ڕەنگە ئەم پرسە بەنێودەوڵەتی بکرێت، ئێمەش تۆڕی پەیوەندییەکانمان بەکاردێنین بۆ چارەسەرکردنی ئەم پرسە”.