سەرۆكی پەرلەمانی ئێران: ئەمریکا راستگۆنییە لە هەڵوێستەکانیدا

SNN-

سەرۆکی پەرلەمانی ئێران دەڵێت: ئەمریکا راستگۆنییە لە هەڵوێستەکانیدا، ئەگەر هەوڵی گەیشتن بە رێککەوتنێکی واقیعی دەدات، دەبێت دەستبەرداری رێبازی سەپاندن و دەست تێكەڵكردن بێت لەگەڵ قەوارەی زایۆنی و سیاسەتە شکستخواردووەکانی ناتانیاهۆ.

محەمەد باقر قالیباف، بەیانی ئەمڕۆ یەکشەممە، لە میانی وتەیەكدا پێش دەستپێكردنی بەرنامەی کاری دانیشتنی پەرلەمان وتی: ئەمریکا باس لە کرانەوەی ئابوری بۆ ئێران دەکات، بەڵام بە کردەوە، نەک هەر هەوڵ دەدات مافی پیتاندنی یۆرانیۆممان لێ زەوت بکات، بەڵکو لە پێگەی خۆسەپێنییەوە، تەنانەت بەڵێنی هەڵگرتنی سزاکانیش نادات.

دەشڵێت: هیچ لۆژیکێکی عەقڵانی، رێککەوتنێکی تاکلایەنە و سەپێندراوی لەو شێوەیە قبوڵ ناکات.

ئاماژەی بەوەشکردووە تاکە چارەسەر رێککەوتنێکی راستەقینەیە کە هەمووان تێیدا براوەبن، ئێران ئامادەیە بۆ بونیادنانی متمانە بە سروشتی ئاشتیخوازانەی بەرنامە ئەتۆمییەکەی، لەڕێی پاراستنی پیتاندن لەسەر خاکەکەی، لە بەرامبەر هەڵگرتنی سزاکان و بەدەستهێنانی دەستکەوتی ئابوری.