لیستی مووچەی مانگی شەش هاوشێوەی لیستی مووچەی مانگی پێنج ئامادەكراوە

SNN-عەلی حەمە سەعید
بەبێ‌ ئەوەی هیچ گۆڕانکارییەکی تێدا بكرێت و بڕیاری لێبڕینی لە%3ی مووچەی فەرمانبەران و خانەنشینان جێبەجێی بكرێت، هاوشێوەی لیستی مووچەی مانگی پێنج لیستی مووچەی مانگی شەش ئامادەكراوە.

بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوە خراوەتەڕوو، ماوەی چەند ڕۆژێكە سیستەمی پەیرۆڵ بۆ ئامادەكردنی لیستی مووچەی مانگی شەش كاراكراوە و سەرجەم وەزارەت و فەرمانگەكان لیستی مووچەی مانگی شەشیان ئامادەكردووە و هیچ گ‌وڕانكارییەكی ئەوتۆ لە لیستەكەدا نەكراوە بەراورد بە مانگی لیستی مووچەی مانگی پێنج.

ئاماژەی بەوەشكرد، ئەگەرچی وابڕیاروابوو لەمانگی شەشەوە لە%3 لە مووچەی فەرمانبەران و خانەنشینان ببڕدرێت، بەلام ئەو لێبڕینەش جێبەجێ‌ نەكراوە و پێدەچێت لەمانگی داهاتووەوە ئەو بڕیارە جێبەجێبكرێت.

ئەو بەرپرسەی وەزارەتی دارایی ئەوەشی خستەڕوو، ئامادەكردنی لیستی مووچە كارێكی ڕۆتینییە و دەبێت مانگانە ئامادەبكرێت، هەركات بەغدا داوای لیستی كرد دەینێرین، بەڵام ئێستا هیچ داواكارییەكی بەغدامان بە دەست نەگەیشتووە لەسەر لیستی مووچەی مانگی شەش لەكاتێكدا هێشتا پارەی مووچەی مانگی پێنج خەرج نەكراوە.