SNN-
ژمارەیەك هاووڵاتی هەرێمی كوردستان دوای ئەوەی لە دورگەی كیش لە باشوری ئێران گیرخواردبوو گەڕێنرانەوە هەرێمی كوردستان.
سروە رەسوڵ، بەرێوەبەری ناوەندی هاوبەشی هەماهەنگی قەیرانەكانی هەرێم لە لێدوانێکیدا رایگەیاند، 80 هاووڵاتی هەرێمی كوردستان و عیراق، بەهۆی راگرتنی گەشتی ئاسمانی لە دوورگەی كیش لە ئێران گیریانخواردبوو گەرێنرانەوە بۆ هەرێمی كوردستان.
وتیشی، ئەو كەسانە 76 هاووڵاتی كورد و چوار هاووڵاتی عەرەب بوو، بە كەشتی گەشتیاری لە دوورگەی كێشەوە گەیەنراونەتە بەندەری بەسرەو لەوێشەوە گەرێنراونەتەوە بۆ هەرێمی كوردستان، پرۆسەی گەڕانەوەی ئەو هاووڵاتییانەش 72 سەعاتی خایاندووە.
لە بەرەبەیانی رۆژی هەینییەوە شەڕ و پێكدادانی توند لە نێوان ئیسرائیل و ئێران دەستیپێكردووە، بەم هۆیەوە لە زۆربەی وڵاتانی دەوروبەری ئەو دوو وڵاتە، گەشتە ئاسمانییەكان وەستاون.
