شەش ئەندامی دادگای باڵای فیدراڵی دەستیان لەكاركێشایەوە و چارەنووسی مووچەی فەرمانبەران بەنادیاری مایەوە
دادگای فیدڕاڵی عێراق
SNN-عەلی حەمە سەعید
لەگەڵ ئەوەی فەرمانبەران و هاووڵاتیانی هەرێم لە چاوەڕوانی ئەوەدابوون ئەمڕۆ دادگای بالای فیدراڵی ئەمرێكی وەلائی دەربكات بۆ خەرجكردنی پارەی مووچە، بەڵام لە پێشهاتێكی چاوەڕواننەكراودا شەش ئەندامی دادگا دەستلەكار كێشانەوەیان پێشكەشكرد
بەگوێرەی ئەو زانیاریانەی كە لە بەرپرسێكی كورد لە بەغدا بە SNNدراون ئەوەخراوەتەڕوو، ئەمڕۆ لە پێشهاتێكی چاوەڕواننەكراودا لە كۆی نۆ ئەندامی سەرەكی دادگای فیدراڵی شەش ئەندامیان داوای دەستلەكاركێشانەوەیان پێشكەشكردووە كە یەكێك لەو ئەندامانەی داواكەی كردووە كوردە.
ئاماژەی بەوەشكرد، جگە لەو شەش ئەندامە سەرەكییە، سێ ئەندامی دیكەی یەدەگی دادگاکە بەهەمان شێوە داوای دەستلەكاركێشانەوەیان پێشكەش كردووە.
ئەو بەرپرسەی كورد لە بەغدا ئەوەشی خستەڕوو، بەهۆی ئەم پێشهاتەوە چارەنووسێكی نادیار چاوەڕێی مووچەی فەرمانبەران دەكات، جگە لەوەش هەموو ئەو سكاڵایانەی دیكە لەو دادایە تۆماركراون چارەنوسیان بەنادیاری دەمێنێتەوە، بۆیە دەبێت بەرپرسانی سیاسی باڵای عێراق بەخێرایی بێنەسەر هێڵ و چارەسەرێك بۆ ئەم دۆخەی عێراق بدۆزنەوە.
