سبەینێ ئەنجوومەنى وەزیران کۆدەبێتەوە و پرسى مووچەى فەرمانبەران تاوتوێ دەکات

سبەینێ ئەنجومەنى وەزیران کۆبونەوەى ئاسایی بەڕێوەدەبات و پرسى راگرتنى مووچەى فەرمانبەرانى هەرێم و خانەنشینى و دەستەبەرى کۆمەڵایەتیی کرێکارانى تێدا تاوتوێ دەکرێت.

بەپێى کارنامەی تایبەت بە کۆبونەوەکەى سبەینێی ئەنجوومەنی وەزیران دوو تەوەرى سەرەکیی گفتوگۆ دەکرێت، یەکێکیان تایبەتە بە پێشکەشکردنى راپۆرتێک لەبارەى داهات و خەرجییەکانى هەرێمى کوردستان و پێشکەشکردنى ئەگەر و چارەسەر و پێشهاتەکان و تەوەرەکەى دیکەیش تایبەتە بە کرێکاران.

لە کارنامەکەدا هاتووە کە لە بڕگەى یەکەمدا هەڵسەنگاندن بۆ بارودۆخى دارایی ئێستاى هەرێمى کوردستان بەتایبەت مووچەى موچەخۆران دەکرێت کە دوو مانگە وەزارەتى دارایی فیدراڵ رایگرتووە و دوا هەوڵەکان بۆ چارەسەرکردنى ئەم بابەتە لەلایەن وەزیرى داراییەوە بە راپۆرتێک پێشکەش دەکرێت و داهات و خەرجییەکانى ئێستا دەخرێنەڕو و ئەگەر و چارەسەر و پێشهاتەکانیش دیاریدەکرێن.

لە تەوەرى دووەمیشدا وەزیرى کار و کاروبارى کۆمەڵایەتیی راپۆرتێک تایبەت بە خانەنیشنى و دەستەبەرى کۆمەڵایەتیی کرێکاران لە هەرێمى کوردستان پێشکەش دەکات و راسپاردە و پێشنیارەکانیش.

ئەمەش لە کاتێکدایە، تائێستا وادەى ناردنى مووچەى مانگى پێنجى فەرمانبەرانى هەرێمى کوردستان دیارنییە و بەهۆى ناکۆکی نێو دادگاى فیدراڵیشەوە تا ئێستا بڕیار لەبارەى موچەى فەرمانبەرانى هەرێمى کوردستانەوە دەرنەکراوە.