ئەو شاندەی عێراق كە حكومەتی هەرێم چاوەڕێیەتی ئیوارەی ئەمڕۆ دەگەنە هەولێر

SNN-عەلی حەمەسەعید
بەمەبەستی چارەسەركردنی ئەو كێشەو گرفتانەی كە بۆناردنی پارەی مووچەی مانگی پێنج و مانگەكانی داهاتوو هاتووەتە پێشەوە، وابڕیارە ئێوارەی ئەمڕۆ شاندێكی بڕیار بەدەستی حكومەتی عێراقی بگەنە هەولێر و لە هەفتەی داهاتووەوە دەستەبە گفتوگۆو بەدواداچوونەكانیان بكەن.

بەگوێرەی ئەو زانیارییانەی كە دەست SNNكەوتوون ئەوەخراوەتەڕوو، وابڕیارە ئێوارەی ئەمرۆ پێنج شەممە شاندێكی باڵای حكومەتی عێراقی بگەنە هەولێر و لەگەڵ سەرۆكی حكومەت و لایەنە پەیوەندیدارەكانی دیكەی تایبەت بە پرسی نەوت و بودجە كۆببنەوە.

ئاماژەبەوەشكراوە، شاندەكەی حكومەتی عێراقی پێكهاتووە لە وەزیری نەوت، جێگری سەرۆك وەزیرانی عێراق بۆكاروباری دارایی و ئابوریی، نوێنەری دیوانی چاودێری دارایی عێراق، نوێنەری كۆمپانیای سۆمۆ، نوێنەری كۆمپانیای نەوتی باكور و چەند بەرپرسێكی دیكەی حكومەتی عێراقی.

SNNئەوەشی زانیوە كە كۆبوونەوە و بەدواداچوونەكانی ئەو شاندەی حكومەتی عێراقی لە هەفتەی داهاتووەوە دەستپێدەكات، ئەوەش بەمەبەستی دۆزینەوەی چارەسەرەكێكی گونجاو بۆ كێشەكانی ناردنی پارەی مووچەی مانگی پێنج و مانگەكانی داهاتوو.