“یەکەم دانیشتنی دادگای فیدراڵی تایبەت دەبێت بە مووچەی فەرمانبەرانی هەرێم”

SNN-

بەڕێوەبەری گشتیی پەیوەندییەكان و رێكخراوە نێودەوڵەتییەكان لە سەرۆكایەتیی كۆماری عێراق رایگەیاند، هەفتەی داهاتوو دانیشتنەکانی دادگای باڵای فیدراڵی دەستپێدەکەنەوە و دەبێت یەکەم دانیشتنیان تایبەت بێت بە مووچەی فەرمانبەرانی هەرێم.

هاوڕێ تۆفیق، بەڕێوەبەری گشتیی پەیوەندییەكان و رێكخراوە نێودەوڵەتییەكان لە سەرۆكایەتیی كۆماری عێراق رایگەیاند، لەدوای کۆتاییهاتنی کێشەکانیان هەفتەی داهاتوو دادگای باڵای فیدراڵی دانیشتنەکانی دەستپێدەکاتەوە، لەبەرئەوەی پێش دەستلەکارکێشانەوەی ئەندامەکانی بڕیاربوو لەبارەی مووچەی فەرمانبەرانی هەرێم کۆببێتەوە و فەرمانسالاری دەربکات، دەبێت یەکەم دانیشتنیان بۆ ئەو پرسە تەرخانبکەن.

ئاماژەی بەوەشکرد، هەموو بۆچوونەکان بەو ئاراستەیەن کە دادگا فەرمانسالارییەک لەبارەی مووچەی فەرمانبەرانی هەرێم دەربکات.

ئەمەش لە کاتێکدایە، دوێنێ یەکشەممە، دوای ئەوەی ئەنجوومەنی باڵای دادوەری عێراق رەزامەندی نیشاندا بە خانەنشینبوونی جاسم محەمەد عەبود سەرۆکی دادگا فیدراڵی و بڕیارەکەش رەوانەی خانەنشینی کرا، ئەنجومەنەکە ئاشکرایکرد، مونزر ئیبراهیم حسێن بۆ پۆستی سەرۆکی دادگای فیدراڵی دەستنیشانکراوە، هەفتەی داهاتوو دانیشتنەکانی دادگای باڵای فیدراڵی دەستپێدەکەنەوە.