ئەکسیۆس: هەفتەی داهاتوو دانوستانەکانی ئێران و ئەمریکا دەستپێدەکەنەوە

SNN-

ئاژانسی هەواڵی ئەکسیۆسی ئەمریکی لە زاری دوو سەرچاوەوە بڵاویکردووەتەوە بڕیارە هەفتەی داهاتوو گەڕێکی دیکەی دانوستانەکانی ئێران و ئەمریکا سەبارەت بە بەرنامە ئەتۆمییەکەی تاران لە ئۆسڵۆ بەڕێوەبچێت.

ئاژانسەکە دەشڵێت:”بڕیارە هەفتەی داهاتوو ستیڤ ویتکۆف، نێردەی تایبەتی ترەمپ لەگەڵ عەباس عێراقچی، وەزیری دەرەوەی ئێران لە ئۆسڵۆی پایتەختی نەرویج کۆببنەوە”.

بە وتەی دوو سەرچاوەکە کە قسەیان بۆ ئاژانسەکە کردووە، تاوەکو ئێستا وادەیەکی یەکلاکەرەوە بۆ بەڕێوەچوونی دانوستانەکە دیارینەکراوە، لەگەڵ ئەوەشدا هیچ کام لە دوو وڵاتەکە بە ئاشکرا دەستپێکردنەوەی دانوستانەکانیان پشتڕاست نەکردووەتەوە.

تاوەکو ئێستا ئێران و ئەمریکا پێنج کۆبوونەوەیان ئەنجامداوە و بڕیاربوو لە15 ی مانگی رابردوو گەڕێکی دیکەی دانوستانەکانیان بەرێوەبچێت، بەڵام بەهۆی شەڕی ئێران و ئیسرائیلەوە، تاران رازی نەبوو کە دانوستانەکانی لەگەڵ واشنتن بەردەوامبن.