“هەرێم بە داواكارییەكانی بەغدا رازی دەبێت و كێشەی مووچە چارەسەردەبێت”

SNN-

شیروان میرزا، ئەندامی لیژنەی دارایی لە خولی پێشووی ئەنجومەنی نوێنەرانی عێراق رایگەیاند، چاوەڕواندەكرێت هەرێمی كوردستان بە داواكارییەكانی عێراق رازی بێت، چونکە هیچ چارەسەرێكی دیكە نییە و دوو مانگە مووچەی مووچەخۆرانی هەرێم نەدراوە.

ئاماژەی بەوەشکرد، فشاری ئەمریكا هەیە بۆ دەستپێكردنەوەی هەناردەی نەوت، هەرێم و بەغدا چەند پێشنیازێكیان خستووەتەڕوو.

شیروان میرزا وتیشی، “چاوەڕواندەكرێت سبەی كۆبوونەوەی دیكە لە نێوان هەرێم و بەغداد ئەنجامبدرێت و ئەگەر رێككەوتنی لەسەر بكرێت رۆژی سێشەممە دەخرێتە بەرنامەی كاری كۆبوونەوەكەی ئەنجومەنی وەزیرانی عێراقەوە.”

ئەمەش لە کاتێکدایە، زیاتر لە 60 رۆژە مووچەی فەرمانبەران و مووچەخۆرانی هەرێم دابەش نەکراوە، بەیانی ئەمڕۆش شاندێکی هەرێمی کوردستان بۆ یەکلاکردنەوەی پرسی مووچە گەیشتە بەغدا.