ئەندامێكی لیژنەی یاسایی: لە ئەگەری ڕێكنەكەوتنی بەغدا و هەولێر، جارێكی دیكە فەرمانبەران سزا دەدرێنەوە

SNN-عەلی حەمە سەعید
ئەندامێكی لیژنەی یاسایی لە ئەنجومەنی نوێنەرانی عێراق ئاماژە بەوەدەكات بەهۆی ناكۆكییەكانی نێوان حكومەتی هەرێم و حكومەتی عێراق تەنها فەرمانبەران و مووچە خۆرانی هەرێم باجەكەیان داوە و سزا دراون لەبری ئەوەی سزای ئەو لایەنە بدرێت كە پابەند نەبووە، بۆیە ئەگەر ڕێككەوتن نەكرێت جارێكی دیكە سزای فەرمانبەران دەدرێتەوە.

دارا سێكانیانی، ئەندامی لیژنەی یاسایی لە ئەنجومەنی نوێنەرانی عێراق بە SNNی ڕاگەیاند: باشترین بژاردنە لە بەردەم هەردوو حكومەتی هەرێم و بەغدا بۆكۆتایی هێنان بە كێشەو گرفتەكانی نێوان هەردوو گەیشتنە بەڕێككەوتن بەگوێرەی یاسای بودجە، نەك بە گوێرەی ڕێككەوتنی شەخسی و میزاجی.

ئاماژەی بەوەشكرد، ئەوەی تا ئێستا گوزەراوە لە نەگەیشتن بەڕێككەوتن و دواكەوتنی مووچە و پاشكەوت و لێبڕینی مووچە، تەنها فەرمانبەرانی هەرێمن باجەكەیان داوە، بۆیە ئەگەر ئەم جارەش هەولێر و بەغدا نەگەنەوە بەڕێككەوتن جارێكی دیكە دەبێت فەرمانبەرانی هەرێم سزا بدرێنەوە و هەر ئەوانیشن باجەكەی دەدەن.

ئەو ئەندامەی لیژنەی یاسایی لە ئەنجومەنی نوێنەرانی عێراق ئەوەشی ڕوونكردەوە، دەبوو حكومەتی عێراقی سزای حكومەتی هەرێم بدات لە بری ئەوەی كە پابەند نەبووە بە ڕێككەوتنەكانەوە، بەلام بەداخەوە هەموو جارێك سزای فەرمانبەران دراوە، بۆیە دۆخەكە گەیشتووەتە ئاستێك پێناچێت ئەمجارە هەروا بتوانن بە ئاسانی لێی دەربچن و بەردەوامن لە سزادانی فەرمانبەران.