بافڵ جەلال تاڵەبانی، سهرۆكى یهكێتیی نیشتمانیی كوردستان | فۆتۆ: SNN
SNN-
پاشنیوەڕۆى ئەمڕۆ مەکتەبى سیاسى یەکێتیى نیشتمانیى کوردستان لە سلێمانى کۆدەبێتەوە و بڕگەى سەرەکیى کۆبوونەوەکە دۆخ و گوزەرانى هاونیشتمانیان و پەیوەندییەکانى نێوان هەولێر و بەغدا و دوایین هەوڵەکانیش بۆ ناردنى مووچە لەلایەن بەغدادەوە تاوتوێدەکرێت.
بەپێی زانیارییەکان، لە کۆبوونەوەکەى مەکتەبى سیاسى یەکێتیى نیشتمانیى کوردستان، گفتوگۆ لەبارەى دۆخ و گوزەرانى هاونیشتمانیانى هەرێمى کوردستان و پەیوەندییەکانى نێوان هەولێر و بەغداد دەکرێت و ئەنجامى کۆبوونەوەى نێوان یەکێتى و پارتیش تاوتوێدەکرێت، کە دوێنی 14 تەموز بەسەرپەرشتیى بافڵ جەلال تاڵەبانى و مەسعود بارزانى لە پیرمام بەڕێوەچوو.
بەگوێرەى زانیارییەکان ئەوەش هاتووە، لەپاش کۆبوونەوەى ئەمڕۆى مەکتەبى سیاسیى یەکێتیی نیشتمانیی کوردستان سبەى چوارشەممە ئەنجوومەنى سەرکردایەتی کۆدەبێتەوە.
ئەمەش لە کاتێکدایەد، لەکۆبوونەوەى دوێنێى مەکتەبە سیاسییەکانى یەکێتى و پارتى، هەردوولا هاوڕابوون هەموو هەوڵەکان چڕبکرێنەوە بۆ چارەسەرى کێشەکان و دابینکردنى مووچە و شایستە داراییەکانى هەرێمى کوردستان و تەواوى ئەو هەنگاوانەى پێویستن لە چوارچێوەى دەستوور بە ئاڕاستەى چارەسەرکردن، بە هاوئاهەنگى هەردوولا بهاوێژرێن.
