ئەنجوومەنی وەزیرانی عێراق
SNN-عەلی حەمە سەعید
ئەمڕۆ سێ شەممە كۆبوونەوەی ئەنجومەنی وەوزیرانی عێراق بەڕێوەدەچێت، بەلام جیاواز لە دوو كۆبوونەوەی هەفتەكانی ڕابردوو، جارێكی دیكە وەزیرەكانی پارتی بایكۆتی كۆبوونەوەكەیان كردووە، ئەوەش ئاماژەیەكە بۆ ئەوەی ئەمڕۆش هیچ بڕیارێك نادرێت بۆ ناردنی پارە.
بەگوێرەی زانیارییەكانی SNNدوا نیوەڕۆی ئەمڕۆ سێ شەممە بە سەرۆكایەتی ( محەمەد شیاع سوادانی) كۆبوونەوەی ئەنجومەنی وەزیرانی عێراق دەستپێكردووە، بەلام هەریەكە لە ( فواد حسێن) وەزیری دەرەوە و ( بەنگین ڕێكانی) وەزیری ئاوەدانكردنەوەی عێراق لە پشكی پارتی ئامادەی كۆبوونەوەكە نین.
ئاماژە بەوەشكراوە، ئامادەنەبوونی ئەو دوو وەزیرەی پارتی ئاماژەیە بۆ ئەوەی كە لە كۆبوونەوەكەی ئەمڕۆی ئەنجومەنی وەزیران هیچ بڕیارێك لەبارەی ناردنی پارە بۆ هەرێم نادرێت، ئەوەش لەدوای ئەوەی لە كۆبوونەوەی هەفتەی ڕابردوو لیژنەیەكی وزاری لەسەر ئەو پرسە پێكهات بەلام لیژنەكەش هیچیان پێنەكرا.
بایكۆتی وەزیرەكانی پارتی لە دانیشتەكانی ئەنجومەنی وەزیران دوای ئەوە دێت كە لەمانگی ڕابردووش بەهەمان شێوە ئەو دوو وەزیرە بایكۆتی دانیشتەكانیان كردبوو، بەلام لەدوو كۆبوونەوەی هەفتەكانی ڕابردوو گەڕانەوە دانیشتنەكان و ئەمڕۆش جاریكی دیكە بایكۆتیان كردەوە.
