سەرکردایەتیی یەکێتی بۆ پرسى مووچە و پەیوەندییەکانى نێوان هەولێر و بەغداد کۆدەبێتەوە
لۆگۆى یەکێتیی نیشتمانیی کوردستان | فۆتۆ: SNN
SNN-
ئەمڕۆ ئەنجوومەنی سەرکردایەتی یەکێتیی نیشتمانیى کوردستان کۆدەبێتەوە و پرسى مووچە و پەیوەندییەکانى هەولێر و بەغداد تاوتوێ دەکات.
بەگوێرەى زانیارییەکان، کۆبوونەوەکە بە سەرپەرشتیی بافڵ جەلال تاڵەبانی سەرۆکى یەکێتیی نیشتمانیی کوردستان بەڕێوەدەچێت و تیایدا دوایین پێشهات و هەوڵەکان بۆ چارەسەرکردنی کێشەی مووچەخۆرانی هەرێمى کوردستان تاوتوێ دەکرێت.
کۆبوونەوەکە لەکاتێکدایە، شەوى رابردوو بافڵ جەلال تاڵەبانی، سەرۆکی یەکێتیی نیشتمانیی کوردستان سەردانی بەغدای کرد و لەگەڵ محەمەد شیاع سودانی سەرۆکوەزیرانی عیراق و فایەق زیدان سەرۆکی ئەنجوومەنی باڵای دادوەری عیراق کۆبووەوە.
هەروەها، دوێنێ مەکتەبى سیاسى یەکێتیى نیشتمانیى کوردستان لە سلێمانى کۆبووەوە و دۆخ و گوزەرانى هاونیشتمانیان و پەیوەندییەکانى نێوان هەولێر و بەغدا و دوایين هەوڵەکانى ناردنى مووچەيان لەلایەن بەغدادەوە تاوتوێكرد.
ئەم هەوڵانەش لەدوای ئەوەدێت، مووچەخۆرانى هەرێمى کوردستان هێشتا مووچەى مانگى پێنجیان وەرنەگرتووە، ناکۆکییەکانیش لەبارەى دۆسییەى نەوت، داهاتنى نانەوتییەوە لەنێوان حکومەتى هەرێمى کوردستان و حکومەتى فیدراڵ بەردەوامن.
