ئەحمەد شەرع: ئەرکی پاراستنی ئاسایشی سوەیدامان بە گروپە ناوخۆییەکان و شێخە ئاینیەکانیان سپاردووە

SNN-
سەرۆکى راگوزەری سوریا، لە وتارێکدا کە بەرەبەیانی ئەمڕۆ پێشکەشی کرد، ئیسرائیلی تۆمەتبار کرد بە دروستکردنی ئاشوب لەناو سوریا و رایگەیاند: کردەوەکانی بووە هۆی هەڵكشانی دۆخەكە لە پارێزگای سوەیدا.

ئەحمەد شەرع لە یەکەم لێدوانیدا، لە دوای رووداوەکانی پارێزگای سوەیدا، كە دەكەوێتە باشوری ئەو وڵاتەو كەمینەی دروزەكانی تیادا دەژی، بەهاوڵاتیانی دروزى وت: ئێمە هەر هەوڵێک رەتدەکەینەوە کە ئامانج لێی راکێشانتان بێت بۆ لایەنێکی دەرەکی یان دروستکردنی دووبەرەکی لەناو ریزەکانماندا.

وتیشی:كەوتینە بەردەم دوو بژاردە، یان رووبەڕووی ئیسرائیل ببینەوە یان چاکسازی لە بەرەی ناوخۆدا بکەین، جەختیشكردەوە لەوەی، ئەوان لەو کەسانە نین کە ترسیان لە شەڕ هەبێت و تەمەنیان لە روبەڕوبونەوەی ئاڵنگاری و بەرگریکردن لە گەلەکەیان بەسەر بردووە، لەگەڵ ئەوەشدا، بەرژەوەندی گەلی سوریایان خستە سەروی پشێوی و وێرانکاری.

سەرۆکی سوریا ئاماژەی بەوەشکرد کە ئەرکی پاراستنی ئاسایشی سوەیدایان بە گروپە ناوخۆییەکان و شێخە ئاینیەکانیان سپاردووە.