نوێترین زانیاری لەبارەی كۆبوونەوەی نائاسایی ئەنجومەنی وەزیرانی عێراق و ناردنی پارەی مووچە

SNN-عەلی حەمە سەعید

وابڕیارە دوانیوەڕۆی ئەمڕۆ ئەنجومەنی وەزیرانی عێراق بەسەرۆكایەتی محەمەد شیاع سودانی سەرۆكوەزیران كۆبوونەوەیەكی نائاسایی ئەنجام بدات، ئەوەش بەمەبەستی پەسەندكردنی ئەو لێكتێگەیشتنەی كە لەنێوان هەولێر و بەغدا هاتووەتە ئاراوە، ئەگەریش زۆرە هەر ئەمڕۆ بڕیار لەسەر ناردنی مووچەی مانگێك بدرێت.

سۆزان مەنسور، وتەبێژی فراكسیۆنی یەكێتی لە ئەنجومەنی نوێنەرانی عێراق بە SNNی ڕاگەیاند: دوای هەوڵەكانی سەرۆكی یەكێتی بۆ كۆتایی هێنان بە گرفتی مووچەی فەرمانبەرانی هەرێم، دواتر ڕەزامەندی حكومەتی هەریمی بەدواخۆیدا هێنا، بۆیە لەو چوارچێوەیەدا ئەمڕۆ ئەنجومەنی وەزیرانی عێراق كۆبوونەوەیەكی نائاسایی ئەنجام دەدات و كۆبوونەوەكەش تایبەت دەبێت بە پرسی مووچەی فەرمانبەرانی هەرێم.

ئاماژەی بەوەشكرد، لە كۆبوونەوەكەی ئەمڕۆدا جەخت لە جێبەجێكردنی بڕیارەكانی دادگا و پابەند بوون بە بڕگەكانی پرۆژەیاسای بودجەی گشتی دەكرێتەوە لەهەمان كاتیشدا سەرۆك وەزیران ئەو لێتێگەیشتنەی لەنێوان هەولێر و بەغدات هاتووەتە ئاراوە دەخاتە بەردەم وەزیران بۆ ئەوەی بڕیاری كۆتایی لەبارەوە بدرێت و بە كۆی گشتی پەسەند بكرێت.

وتەبێژەكەی فراكسیۆنی یەكێتی ئەوەشی خستەڕوو، دوای پەسەندكردنی ڕێككەوتنەی هەولێر و بەغدا، بە ئەگەری زۆرەوە لە كۆبوونەوەكەی ئەمڕۆدا بڕیار لەسەر ناردنی مووچەی مانگێك دەدرێت، بەڵام ناردنی پارەكە دەكەوێتە هەفتەی داهاتوو، چونكە ئەمڕۆ كۆتایی هەفتەیە و ڕۆژانی یەكشەممە و دووشەممە پارە دەنێردرێت، بەمەرجێك هەرێمیش پابەند بێت و داهاتی ناوخۆ ڕەوانە بكات.