دۆناڵد ترەمپ: ئەگەر پێویست بکات هێرش دەکەینەوە سەر ناوەندە ئەتۆمییەکانی ئێران

SNN-

سەرۆکی ویلایەتە یەکگرتوەکانی ئەمریکا رایگەیاند، ئەگەر پێویست بکات، رەنگە ئەمریکا هێرشەکانی بۆ سەر ئێران دووبارە بکاتەوە، ئەوەش لە وەڵامی لێدوانەکانی عەباس عراقچی، وەزیری دەرەوەی ئێران، کە رایگەیاندبوو وڵاتەکەی دەستبەرداری پیتاندنی یۆرانیۆم نابێت.

دۆناڵد ترەمپ ئەمڕۆ سێشەممە لە لێدوانێكدا رایگەیاند: بەرنامە ئەتۆمییەکەی ئێران زیانێکی زۆری بەرکەوتووەو لەناوبراوە، ئەو میدیایانەی گومانیان دروستكرد لە هێزی لێدانەکانمان بۆ سەر ئێران، پێویستە داوای لێبوردن بکەن.

قسەكانی ترەمپ دوای ئەوە دێت، عەباس عراقچی، وەزیری دەرەوەی ئێران جەختیكردەوە لەوەی، وڵاتەكەی دەستبەرداری پیتاندنی یۆرانیۆم نابێت.

عراقچی لە چاوپێکەوتنێکدا لەگەڵ کەناڵی “فۆکس نیوز” وتی: “دامەزراوە ئەتۆمییەکانمان وێران بوون و زیانێکی زۆریان پێگەیشتووە، تا ئێستاش قەبارەی زیانەکان لەلایەن رێکخراوی وزەی ئەتۆمی ئێرانەوە هەڵدەسەنگێندرێت، بەڵام بەپێی زانیاری و باوەڕی من زیانی بەرچاویان بەرکەوتووە.

رۆژی 13ی حوزەیرانی ئەم ساڵ ئیسرائیل هێرشی کردە سەر ئێران و ئەویش بە مووشەک و درۆن وەڵامی دایەوە. جەنگەکە 12 رۆژ بەردەوام بوو، بەڵام رۆژی 22ی حوزەیران، ئەمریکا هەریەکە لە پێگە ئەتۆمییەکانی نەتەنز، فۆردۆ و ئیسفەهانی ئێرانی بۆردوومان کرد.

بەگوێرەی ئاژانسی نێودەوڵەتیی وزەی ئەتۆم، پێش دەستپێکی جەنگی تاران و تەل ئەبیب، ئێران خاوەن سەروو 400 کیلۆگرام یۆرانیۆمی پیتێندراو بوو بە رێژەی 60%. لەڕووی زانستییەوە، وڵاتەکە پێویستی بە نزیکەی مانگێک بوو، بۆئەوەی بۆمبی ئەتۆمی دروستبکات، ئەمەش لە ئەگەری بوونی کەرەستە و ئامێری پێویست.