وتەبێژی خانەنشینان: سبەینێ‌ نزیكەی پێنج هەزار خانەنشین پێنج مووچە پێكەوە وەردەگرن

SNN-عەلی حەمە سەعید

وتەبێژی یەكێتی خانەنشینانی كوردستان ئاماژە بەوەدەكات سبەی لەگەڵ دەستكردن بە دابەشكردنی مووچەی مانگی پێنج، نزیكەی پێنج هەزار خانەنشین لەهەرێمی كوردستان پێنج مووچە و بۆ مووچەی مانگی شەشیش نزیكەی 15 هەزار خانەنشین شەش مووچە پێكەوە وەردەگرن

سادق شێخ عوسمان، وتەبێژی یەكێتی خانەنشینانی كوردستان بە SNNی ڕاگەیاند: بەگوێرەی ئەو داتایانەی لە بەردەستماندان لە سنوری پارێزگای سلێمانی سبەینێ‌ لەگەڵ دابەشكردنی مووچەی مانگی پێنج زیاتر لە هەزار و 150 كەس پێنج مووچە پێكەوە وەردەرگرن و بە گشتیش ەهەرێمی كوردستان نزیكەی پێنج هەزار خانەنشین پێنج مووچە وەردەگرن.

ئاماژەی بەوەشكرد، بۆمانگی شەش لە سنوری سلێمانی زیاد لە دوو هەزار و 300 خانەنشین شەش مووچە پێكەوە وەردەگرن و لەهەرێمی كوردستانیش ژمارەكە دەگاتە نزیكەی15 هەزار خانەنشین كە شەش مووچە پیكەوە وەرگرن.

وتەبێژەكەی یەكێتی خانەنشینان ئەوەشی خستەڕوو، بۆ مووچەی مانگی حەوت، لە سلێمانی هەزار و 300 كەسی دیكە ناویان خراوەتە لیستی مووچە، و لەتەواوی هەرێمیش ژمارەكە دەگاتە نزیكەی پێنج هەزار، هاوكات پێدەچێت لە مانگی هەشت ئەوەی دەمێنێتەوە لەو فەرمانبەرانەی ئەمساڵ خانەنشینكران ناویان بخرێتە لیستی مووچەی مانگی هەشت و كۆتایی بە پێدانی پارەی خانەنشینانی ئەمساڵ بهێندرێت.