کۆمسیۆن: شەممەی داهاتوو تیروپشکی پێدانی ژمارە بە لیست و كاندیدەكان بەڕێوەدەچێت

SNN-

کۆمسیۆنی باڵای سەربەخۆی هەڵبژاردنەکانی عێراق ڕایگەیاند، شەممەی داهاتوو تیروپشک بۆ پێدانی ژمارە بە لیست و کاندیدەکان دەکرێت.

جومانە غەلای، وتەبێژی کۆمسیۆنی باڵای سەربەخۆی هەڵبژاردنەکان رایگەیاند: کۆمسیۆن رۆژی 10ی ئەم مانگە کە دەکاتە ڕۆژی یەکشەممەی هەفتەی داهاتوو، یەکەمین تاقیکردنەوەی ئەزموونی لە هەزار و 79 وێستگەی دەنگدان لە عێراق و هەرێمی کوردستان دەکات.

دەشڵێت: تاقیکردنەوەکە لە ناوەندەکانی تۆمارکردن و 20 نووسینگەی هەڵبژاردنی پارێزگاکان دەبێت و فەرمانبەرانی کۆمسیۆنیش وەک دەنگدەر بەشداریی تیایدا دەکەن و لە هەر پارێزگایەک وێستگەیەکی دەنگدانی تایبەت بە هەماهەنگی لایەنە ئەمنییەکان دەکرێتەوە.

جومانە غەلای ئاماژەی بەوەشکرد، ئامانج لەم کارە ئامادەکارییە بۆ هەڵبژاردنی پەرلەمانی عێراق و دڵنیابوونەوەیە لە کارایی و ئامادەیی ئامێرەکانی دەنگدان.

“کاتژمێر 11:00ی پێشنیوەڕۆی رۆژی 9ی ئەم مانگە کە دەکاتە رۆژی شەممەی هەفتەی داهاتوو، تیروپشک بۆ پێدانی ژمارەی هەڵبژاردن بە هاوپەیمانی و پارتەکان و کاندیدەکان بۆ کورسیی گشتی و کۆتای کەمینەکان بەڕێوەدەچێت” جومانە غەلای وای وت.

بڕیارە هەڵبژاردنی پەرلەمانی عێراق لە 11ـی تشرینی دووەمی ئەمساڵ بکرێت، پەرلەمانی عێراق لە 329 کورسی پێکدێت کە 320 یان گشتی و 9 یەکەی دیکە کۆتان.

لە عێراق نزیکەی 29 ملیۆن کەس مافی دەنگدانیان هەیە، زیاتر لە 21 ملیۆن کەس کارتی بایۆمەتری دەنگدانیان هەیە و دەتوانن دەنگبدەن.