وەفدێكی وەزارەتی دارایی هەرێم بۆ پرسی مووچە گەیشتنە بەغدا

SNN-

بەیانی ئەمڕۆ وەفدێكی تەكنیكیی وەزارەتی دارایی و ئابووری هەرێمی كوردستان بۆ گفتوگۆكردن لەبارەی مووچە، گەیشتە بەغدا.

لەوبارەیەوە سەرچاوەیەك لە وەزارەتی دارایی و ئابووریی هەرێمی كوردستان رایگەیاند، وەفدێكی تەكنیكیی وەزارەتی دارایی گەیشتووەتە بەغدا، كە لە كۆبوونەوەی رۆژی سێشەممەی ئەنجومەنی وەزیرانی عیراقدا داوا كرابوو ئەو وەفدە بچێت.

بەپێی وتەی ئەو سەرچاوەیە، سەردانەكەی ئەمڕۆی وەفدەكەی هەرێم تایبەتە بە دەستپێكردنەوەی گفتوگۆكان لەبارەی مووچەی فەرمانبەران و كارەكانی لیژنە هاوبەشەكان و دەستپێكردنەوەیان.

رۆژی سێشەممە ئەنجومەنی وەزیرانی عیراق، كۆبوونەوەی ئاسایی خۆی ئەنجامدا كە بەشێكی تایبەت بوو بە پرسی نەوت و مووچەی هەرێمی كوردستان، لە كۆبوونەوەكەدا، وەزیری نەوت بەپێی راپۆرتی لیژنەكان لەسەر كێڵگە نەوتییەكانی هەرێمی كوردستان رایگەیاندووە، هەرێم توانای بەرهەمهێنانی 130 هەزار بەرمیل نەوتی هەیە و لەوبڕەش 50 هەزاری بۆ ناوخۆی هەرێمی كوردستان دەبێت و بەغدا 80 هەزاری وەردەگرێت.

بەپێی راپۆرتی لیژنەكە، بەهۆی هێرشە درۆنییەكان، كێڵگە نەوتییەكان زیانێكی زۆریان پێگەیشتووە و بەشێك لە كۆمپانیاكانیش ترساون و كار ناكەن، ئەمەش بووەتە هۆی كەمبوونەوەی بەرهەمهێنان.