کۆمپانیاى سۆمۆ: گرێبەستەکانى فرۆشتنى نەوتى هەرێمى کوردستان تەواوکراون
وەزارەتی نەوتی هەرێم و عێراق
SNN-
کۆمپانیاى سۆمۆ بۆ بەبازاڕکردنى نەوتى عێراق رایگەیاند، گرێبەستیان لەگەڵ کۆمپانیا کڕیارەکانى نەوت بۆ فرۆشتنى نەوتى هەرێمى کوردستان تەواوکردووە و چاوەڕوانن کۆمپانیا بەرهەمهێنەرەکان نەوتى بەرهەمهێندراو رادەستبکەن.
عەلى نزار، بەڕێوەبەرى گشتیی کۆمپانیاى سۆمۆ رایگەیاند، کۆمپانیاکە سەرجەم ئامادەکارییەکانى بۆ هەناردەکردنەوەى نەوتى هەرێمى کوردستان تەواوکردووە، گرێبەست لەگەڵ کۆمپانیا کڕیارەکانى نەوت بۆ فرۆشتنى نەوتى هەرێمى کوردستان تەواوکراوە.
وتیشى، کۆمپانیاکە لە ئامادەکارى تەواودایە و هەناردەکردنەوەى نەوت بەستراوە بە رادەستکردنى نەوتى بەرهەمهێنراو لەلایەن کۆمپانیاکانەوە.
بەگوێرەی رێککەوتنى نێوان هەولێر و بەغداد پێویستە هەرێمى کوردستان رۆژانە 230هەزار بەرمیل نەوت رادەستى سۆمۆبکات، بەڵام تاوەکو ئێستا نەوت رادەست نەکراوە.
