داهاتی فیدراڵی و نافیدراڵی بووەتە گرفت لەبەردەم ڕێككەوتنی هەرێم و بەغدا

SNN-عەلی حەمە سەعید

لەگەڵ ئەوەی وابڕیاربوو پێش كۆبوونەوەی ئەنجومەنی وەزیران لە ڕۆژی یەكشەممەی داهاتوو لیژنەهاوبەشەكانی نێوان هەولێر و بەغدا ڕاپۆرتی كۆتایی خۆیان بنوسن لەسەر كۆی بابەتەكان، بەڵام بابەتی داهاتە فیدراڵییەكان و نافیدراڵییەكان بووەتە گرفت لەبەردەم نوسینی ڕاپۆرتی كۆتایی.

د. بڕیار رەشید، ئەندامی ئەنجومەنی نوێنەرانی عێراق لە فراكسیۆنی یەكێتی بەSNN-ی ڕاگەیاند: لیژنەهاوبەشەكانی نێوان حكومەتی هەرێم و حكومەتی عێراقی هێشتا ڕاپۆرتی كۆتاییان لەسەر بابەتە داراییەكان نەنوسیوە و تەنها سبەی شەممەیان لەبەردەستداماوە بۆ ئەوەی ڕاپۆرتەكە ئامادەبكەن و لە ڕۆژی یەك شەممە رادەستی ئەنجومەنی وەزیران و وەزیری دارایی بكرێت.

ئاماژەی بەوەشكرد، پێناچیت تا سبەی شەممەش بتواندرێت ئەو ڕاپۆرتە ئامادەبكرێت، چونكە هێشتا ناكۆكی هەیە لەنێوان هەرێم و بەغدا لەسەر بابەتی داهاتی فیدراڵی و داهاتی نافیدراڵی، بەجۆریك هەرێم دەڵێت كۆی لە%50ی داهاتی فیدراڵی رشەوانەی بەغدا دەكەم، بەڵام عێراق داوای لە%50ی كۆی گشتی داهاتی هەرێم دەكات.

ئەو ئەندامەی ئەنجومەنی نوێنەرانی عێراق ئەوەشی خستەڕوو، ئەگەر تا سبەی شەممە ئەو ڕاپۆرتانە ئامادە نەكرێن ئەوا پێناچێت لە كۆبوونەوەی ڕۆژی یەكشەممەی ئەنجومەنی وەزیرانی عێراق بڕیاری ناردنی پارە بۆ مووچەی مانگی شەش بدرێت، هاوكات ئەو بابەتەش دەكەوێتە هەفتەی داهاتووتری دوای كۆتایی هاتنی یادی عاشورا.