عێراق چاوەڕێی هەرێمی کوردستانە بۆ هەناردەکردنەوەی نەوت

SNN-

عێراق ئامادەکاری تەواوی بۆ وەرگرتنی نەوتی هەرێمی کوردستان کردووە و چاوەڕێی ئەنجامی کۆبوونەوەی نێوان وەزارەتی سامانە سروشتییەکان و کۆمپانیاکانی نەوت دەکات بۆ دەستپێکردنەوەی هەناردەکردن.

عامر خەلیل، بەڕێوەبەری گشتیی کۆمپانیای نەوتی باکوور رایگەیاند، وەزارەتی سامانە سروشتییەکان پێی ڕاگەیاندین، هێشتا لەگەڵ کۆمپانیاکانی نەوت نەگەیشتوونەتە ڕێککەوتنی کۆتایی. بڕیارە ڕۆژی شەممە لەگەڵ کۆمپانیاکاندا کۆببنەوە، ئێمەش چاوەڕێی ئەنجامی کۆبوونەوەکە دەکەین.

ئاماژەی بەوەشکرد، بۆری نەوت بەتەواوی ئامادەیە، کۆمپانیاکەمان 13 کارمەندی لە زاخۆ و ناوچەکانی دیکەی ڕێڕەوی بۆرییەکە تاوەکو تورکیا داناوە، 8 کارمەندیشی لە بەندەری جەیهاندا جێگیرکردوون و بەتەواوی ئامادەین بۆ هەناردەکردن.

لەبارەی بڕی ئەو نەوتەی کە بڕیارە ڕادەستیان بکرێت، بەڕێوەبەری گشتیی کۆمپانیای نەوتی باکوور دەڵێت، “لە وەزارەتی سامانە سرووشتییەکان پێیان گوتین هێشتا بڕەکە دیار نییە کە چەند ڕادەست دەکەین، بەڵام ئاگادارین ئێستا ڕۆژانە 150 هەزار بەرمیل بەرهەم دێت، 50ی بۆ ناوخۆ و 100 هەزاریش بۆ هەناردەکردنەوە، بەگوێرەی زیادبوونی بەرهەمیش، بڕی هەناردەکردن زیاتر دەکرێت.”