لە رووداوێکی هاتوچۆدا لە جەزائیر 18 کەس بوونە قوربانی

SNN

لە رووداوێکی سەختی هاتوچۆدا لە جەزائیر 18 کەس بوونە قوربانی، ئەم رووداوەش بووە جێگەی نیگەرانی و شۆکی هاووڵاتیانی ئەو وڵاتە.

ئەمڕۆ شەممە 16ی ئاب، رووداوێکی سەختی هاتوچۆ لە جەزائیر روویدا، لە روداوەکەدا پاسێکی نەفەرهەڵگر بەسەر پردێکدا لە رۆژهەڵاتی جەزائیر وەرگەڕا، بەو پێیەی شۆفێرەکە نەیتوانیوە کۆنترۆڵی پاسەکە بکات و راستەوخۆ دەکەوێتە ناو بەناوبانگترین دۆڵی جەزائیر بەناوی “حەراش”، لە روداوەکەدا تەنها شۆفێرەکە و کۆکەرەوەی بلیتەکان رزگاری بووە، 18 سەرنشینی ناو پاسەکە گیانیانلەدەستداوە و بەشێکی دیکەیان رزگار کراون.

یەکێک لە رزگاربووانی روداوەکە دەڵێت: “باش لەبیرم نییە، تەنها ئەوە نەبێت هەر کە شۆفێرەکە کۆنتڕۆڵی پاسەکەی لەدەستدا و دواتر کەوتینە خوارەوە و بازم دا، دەڵێت، من لە پێشەوەی پاسەکە وەستابووم و توانیم لە پەنجەرەکەوە دەربچم، پاشان هاووڵاتییان هاوکارم بوون بۆ ئەوەی بگەمە وشکانی”.

دوای روداوەکە، دەسەڵاتدارانی جەزائیر رۆژێکی ماتەمینی نیشتمانییان راگەیاند و ئاڵای وڵاتەکەیان بۆ نیوە دابەزاند، هەروەها بڕیاریاندا بە بڕی 4 هەزار و 500 دۆلار قەرەبووی کەسوکاری قوربانییەکان بکەنەوە.