“كاری بەغدا نییە مووچە بدات بە فەرمانبەرانی هەرێم”

SNN-

فوئاد حسێن، وەزیری دەرەوەی عێراق لە چاوپێکەوتنێکیدا لەگەڵ کەناڵی “الشمس” رایگەیاند، “لەڕووی دەستوورییەوە، كاری بەغدا نییە مووچە بدات بە فەرمانبەرانی هەرێم، دەبێت پشكی هەرێم بنێرێت، ئەو كارە پەیوەستە بە حكومەتی هەرێم، بۆیە ئەوەی بەغدا دەیكات دەستدرێژییە بۆ سەر دەسەڵاتەكانی هەرێمی كوردستان.”

ئاماژەی بەوەشکردووە، “لێكگەیشتنێكی روون هەیە لەبارەی رادەستكردنی نەوت بە بەغدا، ئەمە چارەسەرێکی کاتییە و تاکۆتایی ئەمساڵە، چارەسەری هەمیشەیی دەبێت لە رێگەی یاسای نەوت و غازە بێت.”

فوئاد حسێن باسی لەوەشکرد، “کورد لەسەر بنەمای دەستوور لێكدانەوە بۆ كێشەكان دەكات، دەستوور نا ناوەندی و فیدراڵییە، لە بەغداش پشتیان بە یاساكان بەستووە، زۆرینەی یاساكانیش یاسای كۆنن و ناوەندین.”

وەزیری دەرەوەی عێراق جەختی لەوەکردەوە، “عێراق نایەوێت ببێتە بەشێک لە بەرەکانی جەنگ، یەکخستنی بەرەکانی جەنگ کاری ئەوانی ترە نەک عێراق.”