كۆمیسیۆن كۆتا وادەی بۆ لایەنە سیاسییەكان دیاریكرد

عەلی حەمە سەعید-SNN

وتەبێژی كۆمسیۆنی باڵای سەربەخۆی هەڵبژاردنەكانی عێراق ئاماژە بەوەدەكات تا ئێستا 627 كاندیدی لایەنە سیاسییەكان و هاوپەیمانییەكان بەهۆكاری جیاواز لە كاندید بوون دوورخراونەتەوە، هاوكات ڕۆی 4/9/2025 كۆتا وادەیە بۆ حزبە سیاسییەكان بۆ دانانی جێگرەوە بۆ كاندیدە دوورخراوەكان.

جمانە غەلای، وتەبێژی كۆمسیۆنی باڵای سەربەخۆی هەڵبژاردنەكانی عێراق بەSNNی ڕاگەیاند: ئەنجومەنی كۆمیسیاران ڕۆژی 4/9/2025 یان وەك دوا وادە دیاركردووە بۆ دانانی جێگرەوە بۆ كاندیدە دوورخراوەكان، لەكاتێكدا درووخستنەوەی كاندیدەكان تەنها ئەركی كۆمسیۆن نییە، بەڵكوو چەندین دەزگای فەرمی تێیدا بەشدارن.

ئاماژە بەوەشكرد، تا ئێستا 627 كاندید بەهۆكاری جیاواز وەك بوونی پەیوەندیان بە ڕژێمی بەعسەوە لەپێشتر و تەواو نەبوونی مامەڵەكانیان و بوونی پێشینەی تاوان دوورخراونەتەوە، هاوكات دۆسییەی دوورخستنەوەی كاندیدەكان بە كراوەیی دەمێنێتەوە تا ئەو كاتەی لایەنە پەیوەندیدارەكان پابەند دەبن بە یاساكانی كۆمسیۆنەوە.

وتەبێژەكەی كۆمیسیۆنی باڵای سەربەخۆی هەڵبژاردنەكانی عێراق ئەوەشی خستەڕوو، تا ئێستا هیچ ئاماژەیەك بۆ دواخستنی هەڵبژاردن بە كۆمیسیۆن نەدراوە و بەگوێرەی ئەو بەرنامە و پلانەی دامانناوە، لە ئامادەكارییەكانمان بەردەوامین كە بڕیارە لە 11/11/2025 پرۆسەی هەڵبژاردن بەڕێوەبچێت.