باڵامبۆ محەمەد: لە دەستگیركردنی لاهور جەنگی پارتی هێندە تەنگەتاو بووە بەرەی گەل هێندە ئەو بابەتەی بە قورس وەرنەگرتووە

عەلی حەمە سەعید-SNN
بە وتەی چاودێرانی سیاسی لە دۆسیەی دەستگیركردنی لاهور جەنگی و ئەو چەكدارانەی كە ئارامی سلێمانیان شێواندووە و ڕووبەڕووی یاسا بوونەوە، هێندە پارتی پێتەنگەتاو بووە و بووە بە گرێ بەسەر دڵیانەوە، هێندە بەرەی گەل كە لاهور جەنگی دامەزرێنەریەتی بابەتەكەیان بە قورس وەرنەگرتووە.

باڵامبۆ محەمەد، چاودێری سیاسی و ئەندامی خولی پێنجەمی پەرلەمانی كوردستان بە SNNی ڕاگەیاند: لە كوردەواریدا پەندێك هەیە دەڵێت” دار هەڵبگرە سەگی دز خۆی دەردەخات” ئەم پەندە ڕێك بەسەر پارتی دا هاتووە، چونكە بەبێ‌ ئەوەی ئەم دۆسیەی دەستگیركردنەی لاهور جەنگی و چەكدارە لەیاسا دەرچووەكانی پەیوەندییان بەو حزبەوە هەبێت، بەڵام ڕاستەوخۆ خۆیان كردووە بەخاوەنی دۆسیەكە و هێندە تەنگەتاو بوون بەرەی گەل ئەو بابەتەیان هێندە قورس وەرنەگرتووە.

ئاماژەی بەوەشكرد، ئەگەر پارتی دەستی نییە لەو ئاژاوەگێڕی و پلانانەی كە دژ بە یەكێتی و سلێمانی دانراون بۆچی هێندە خۆی تێكداوە و بەهەموو تاوانای خۆیەوە میدیاكانی خستووەتە كار بۆ دژایەتیكردنی هێزە ئەمنییەكان لە ڕووبەڕووبوونەوەی ئەو كەسانەی كە لەیاسا دەرچووبوون و ئامادەنەبوون ملكەچی یاسا ببن.

ئەو چاودێرەسیاسییە ئەوەشی ڕوونكردەوە، پارتی خۆی شكستی هێناوە لە دابینكردنی ئارامی و ڕووبەڕووبوونەوەی ئەوانەی لە یاسا دەرچوون، پێی قورسە كە یەكێتی سەركەوتووبێت لە ڕووبەڕووبوونەوەی لە یاسا دەرچووان، كە ئەمەش تەواو پێچەوانەی ئەو پرەنسیپەیە كە حكومەتی لەسەر پێكهاتووە لە نێوان یەكێتی و پارتی، بۆیە هیچ گەرنتییەك نییە لە داهاتووشدا پارتی بەهەمان شێوە مامەڵە لەگەڵ سلێمانی و یەكێتی بكات.