نوێترین زانیاری لەبارەی گەیشتنی پارە و دابەشكردنی مووچەی مانگی شەش

عەلی حەمەسەعید-SNN

ئەندامێكی لیژنەی دارایی لە پەرلەمانی عێراق ئاماژە بەوەدەكات دوای ناردنی 120 ملیار دیناری داهاتی ناوخۆ بۆ بەغدا و هاوكات وەزیری دارایی عێراقیش ڕەزامەندی لەسەر خەرجكردنی پارەی مووچەداوە، بۆیە بە ئەگەری زۆرەوە سبەی یەكشەممە پارەكە دەگاتە هەرێم و دوو شەممە دەستبەدابەشكردنی مووچە دەكرێت.

د.نەرمین مەعروف، ئەندامی لیژنەی دارایی لە پەرلەمانی عێرا ق بە SNNی ڕاگەیاند، ناردنی پارەی مووچەی مانگی شەشی فەرمانبەرانی هەرێم لە قۆناغی كۆتایدایە و بە ئەگەری زۆرەوە سبەی ڕێكارەكانی ناردنی پارەكە كۆتایی دێت و هەر سبەینێش پارەی مووچە لە بانكی ناوەندییەوە دەخرێتە سەر ژمارە حسابی بانكی هەرێم، ئەوەش دوای ئەوەی هەرێم 120 ملیار دیناری داهاتی نانەوتی خستە سەر ژمارە حسابی بانكی ناوەندی لە هەولێر.

ئاماژەی بەوەشكرد، وەزیری دارایی عێراق ڕۆژی پێنجشەممە ڕەزامەندی لەسەر خەرجكردنی مووچەی مانگی شەشی دابوو، بەڵام بەهۆی تەواو بوونی دەوامەوە نەتواندرا ڕێكارەكانی دیكەی ناردنی پارەكە تەواو بكرێن، بۆیە سبەی لەگەڵ دەستپێكردنەوەی دەوام ئەو ڕێكارانەش تەواو دەكرێن و پارە ڕەوانەی هەرێم دەكرێت.

بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوەخراوەتەروو، لەگەڵ گەیشتنی پارە ڕاستەوخۆ لیستی مووچەی مانگی شەش بڵاودەكەینەوە كە لە ئێستادا لیستەكە ئامادەیە و هاوشێوەی مانگی پێنج لەماوەیەكی زۆر كەمدا مووچەی مانگی شەشی سەرجەم فەرمانبەران دابەشدەكرێت كە بە مووچەی خانەنشینانی شارستانی و زیندانیانی سیاسی بەركەوتووانی چەكی كیمیایی دەستپێدەكات.