نوێترین زانیاری لەسەر زیادكردنی منداڵی تازەلەدایك بوو لەسەرفۆڕمی خۆراك

عەلی حەمە سەعید-SNN

بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم ئاشكرایكرد كە قۆناغی یەكەمی تۆماركردنی پسووڵەی خۆراك بەشێوەی ئەلیكترۆنی كۆتایی هات و لەچەند ڕۆژی داهاتوو قۆناغی دووەم دەستپێدەكات كە چەند كارێك لەخۆدەگرێت، بەڵام قۆناغی داهاتوو بە پارە دەبێت كە تێچووكەی 11 هەزار دینارە.

نەوزاد شێخ كامیل، بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم بە SNNی ڕاگەیاند: لە ئێستادا پرۆسەی پڕكردنەوەی فۆڕمی خۆراك بەشیوەی ئەلیكترۆنی ڕاگیراوە، ئەوەش قۆناغی یەكەمی پرۆسەكە بوو، كە بەشێوەیەكی گشتی زیاد لە %86 ی هاووڵاتیانی هەرێم توانیان فۆڕمی حۆراكی ئەلیكترۆنی پڕبكەنەوە.

ئاماژەی بەوەشكرد، ئەو خێزانانەی كە لە قۆناغی یەكەمدا نەیانتوانی خۆیان تۆماربكەن و فۆڕمەكە پڕبكەنەوە، دەبێت چاوەڕێبكەن تا قۆناغی دووەم دەستپێدەكات لە چەند ڕۆژی داهاتوودا، بەڵام ئەوكات دەبێت بۆ هەر خێزانێك بڕی 11 هەزار دینار بدەن ئەو بڕە پارەكەیەش دەگەڕێتەوە بۆ وەزارەتی بازرگانی عێراق.

بەڕێوەبەری گشتی بازرگانی لە وەزارەتی بازرگانی عێراق ئەوەشی خستەڕوو،لە چەند ڕۆژی داهاتوو قۆناغی دووەم دەستپێدەكات، كە خۆی دەبینێتەوە لە زیادكردنی منداڵی تازەلەدایك بوو بۆ سەر فۆڕمی خۆراك، مامەڵەی هاوسەرگیری، گواستنەوەی فۆڕمی خۆراك لە پارێزگایەكەوە بۆ پارێزگایەكی دیكە، بەڵام هەموو ئەو مامەڵانەش بە بڕێك پارە دەبن كە كەمترینیان سێ‌ هەزار دینارە و زۆرترینشیان 11 هەزار دینار دەبێت.