ترەمپ بۆ ناتانیاهوو: هێرشکردنە سەر قەتەر ژیرانە نەبوو
ترەمپ و ناتانیاهۆ
SNN
دۆناڵد ترەمپ، سەرۆکی ئەمریکا لە پەیامێکدا بۆ ناتانیاهوو رایدەگەیەنێت هێرشکردنە سەر قەتەر و کوشتنی سەرکردەکانی حەماس لەو وڵاتە ژیرانە نەبووە.
ئەمڕۆ پێنجشەممە 11ی ئەیلوول، رۆژنامەی وۆڵ ستریت جۆرناڵ بە پشتبەستن بە زانیاری لێپرسراوانی باڵای ئیدارەی ئەمریكا بڵاویكردەوە، دۆناڵد ترەمپ، پەیوەندییەكی تەلەفۆنی لەگەڵ بنیامین ناتانیاهۆ، سەرۆکوەزیرانی ئیسرائیل ئەنجامداوە و سەرەرای ئەوەی زۆر بە توندی قسەی كردوە بە ناتانیاهۆشی وتووە، “بڕیارەكەت بۆ بە ئامانجگرتنی سەركردەكانی حەماس لە ناوخۆی قەتەر، ژیرانە نەبووە.”
هاوکات، ترەمپ پێشتریش لەبارەی هێرشەکانی ئیسرائیلەوە بۆ سەر وڵاتی قەتەر بێبەریبوونی ئەمریکای لەو هێرشانە رایگەیاندبوو وتبووی “هیچ پەیوەندییەکمن بە هێرشەکەی دەوحەوە نەبووە”.
ئەمەش دوای ئەوەهات، ئیسرائیل لە 9ی ئەیلوولدا هێرشی کردە سەر وڵاتی قەتەر و لەو هێرشەدا چەندین بەرپرسی حەماس کوژران، دوابەدوای ئەوە بەرپرسانی قەتەر رایانگەیاند، بەرامبەر ئەو هێرشانە بێ وەڵام نابین.
