كێڵگە پەلەوەرییەكانی هەرێم ساڵانە 280 هەزار تۆن گۆشتی مریشك بەرهەمدەهێنن

عەلی حەمە سەعید-SNN

وتەبێژی وەزارەتی كشتوكاڵ و سەرچاوەكانی ئاوی حكومەتی هەرێم  ئاماژە بەوەدەكات هەرێمی كوردستان پێویستی ساڵانەی بە گۆشتی سپی بریتییە لە 150 هەزار تۆن، بەڵام ساڵانە 280 هەزار تۆن بەرهەم دەهێندرێت، ئەوەش بڕێكی زۆرە، بۆیە پلانمان هەیە ئەو زیادەیە ڕەوانەی بازاڕی وڵاتانی كەنداو بكات.

هیوا عەلی، وتەبێژی وەزارەتی كشتوكاڵ و سەرچاوەكانی ئاوی حكومەتی هەرێم بە SNNی ڕاگەیاند: ساڵانە هەرێمی كوردستان پێویستمان بە 150 هەزار تۆن گۆشتی مریشكە، بەڵام كێڵگە پەلەوەرییەكان نزیكەی دوو هێندەی ئەو بڕە گۆشت بەرهەم دەهێنن و ساڵانە بەرهەمی گۆشتی مریشك دەگاتە 280 هەزار تۆن گۆشت، ئەوەش بڕێكی زۆرە و دەبێت بازاڕی بۆ بدۆزرێتەوە بۆ ساغكردنەوەی.

ئاماژەی بەوەشكرد، شانبەشانی زیادبوونی بەرهەمی گۆشتی سپی، بەرهەمی هێلكەش بەهەمان شێوە زۆر زیادیكردووە، لە ئێستادا كۆی گشتیی پڕۆژەكانی بەرهەمهێنانی هێلكە گەیشتووەتە 55 پڕۆژە، لەكاتێكدا بەر لە چەند ساڵی رابردوو زۆر كەمتر لەو ژمارەیە پرۆژەی بەرهەمهێنانی هێلكەمان هەبوو لەهەرێمی كورستان ئەمەش وایكردووە كە بەشی پێداویستی ناوخۆیی هەرێمی كوردستان و عێراق لە بەرهەمی هێلكە لەو پرۆژانەوە بەرهەم بهێندرێت.

وتەبێژەكەی وەزارەتی كشتوكاڵ ئەوەشی خستەڕوو، بەپێی یاسای پارێزگاریكردن لە بەرهەمی ناوخۆیی و رۆژمێری كشتوكاڵی، هاوردەكردنی گۆشتی مریشك و هێلكە بە هەموو شێوەیەك قەدەغەیە، بۆ ئەوەی پاڵپشتیی بەرهەمهێنەرانی خۆمان بین، هاوكات بۆ ساغكردنەوەی ئەو بەرهەمە زیادەی كە ساڵانە لە گۆشت و هێلكە بەرهەمی دەهێنین، پلانمان هەیە كە بەرهەمی كێڵگەكانی كوردستان ڕەوانەی بازاڕی وڵاتانی كەنداو بكەین.