ئەمڕۆ ڕۆژێكی یەكلاكەرەوەیە، زێڕ دەفڕێت یان دادەبەزێت، وەڵامەكەی لە SNNەوە وەربگرە
عەلی حەمە سەعید-SNN
وابریارە كاتژمێر نۆ و 30ی خولەكی ئەمشەو بانكی فیدراڵی ئەمەریكا بڕیاری خۆی بدات لەسەر دیاریكردنی ڕێژەی سود، بەوتەی شارەزایانی ئابوری ئەگەر ڕێژەی سود 50 خاڵ بەرز بكرێتەوە زێڕ نرخی خەیاڵی بەخۆیەوە دەبینێت و دەفڕێت، ئەگەریش لە 25 خاڵ یان كەمتر ڕێژەی سود دابەزێندرێت نرخی زێڕ یان دادەبەزێت یان بەلایەنی كەمەوە لەو نرخەی ئێستا زیاتر بەرز نابێتەوە.
ئاری مەولود، شارەزا لەكاروباری دارایی و خاوەن نوسینگەی كڕین و فرۆشتنی زێڕ بە SNNی ڕاگەیاند؛ ئەمڕۆ هەموو جیهان چاوی لەسەر قسەكانی ( جێرۆم پاوڵ) سەرۆكی بانكی فیدراڵی ئەمەریكایە، كە وابڕیارە لە كاتژمێر 9 و 30ی خولەكی ئەمشەو كۆنگرەی ڕۆژنامەنوسی بكات و سیاسەتی داهاتووی بانكی فیدراڵی ئەمەریكا ئاشكرا بكات.
ئاماژەی بەوەشكرد، سیناریۆكان لە دوو ئەگەر تێناپەڕن، یان ئەوەیە بڕیار دەدات سودی بانكی بۆ 50 خاڵ بەرو بكاتەوە، ئەوكات نرخی دۆلار دادەبەزێت و لە بەرامبەردا نرخی زێڕ زۆر بەرز دەبێتەوە كە لە مێژوودا ڕووی نەداوە، ئەگەریش بڕیار لەسەر كەمكردنەوەی 25 خاڵی سودی بانكی بدات، ئەوا نرخی دۆلار بەرز دەبێتەوە و لەبەرامبەردا نرخی زێڕ یان بەرز نابێتەوە لەو نرخی ئێستا هەیە یاخود بۆ ماوەی كورت خایەن دابەزین بە خۆیەوە دەبینێت.
ئەو شارەزایەی بواری ئابوری ئەوەشی خستەڕوو، لەدوو ڕۆژی ڕابردوو ئۆنسەیەك زێڕ گەیشتە سێ هەزار و 97 دۆلار ئەوەش بەرزترین نرخی زێرە لەمێژوودا، بەڵام ئەمڕۆ بۆ سێ هەزار و 80 دۆلار دابەزیوە، ئەمشەویش دەبێتە شەوێكی یەكلاكەرەوە بۆ زێڕ یان زێڕ هێندە بەرز دەبێتەوە كە مسقاڵێك زێری عەیارە 21 بگاتە نزیكی 800 هەزار دینار، یاخود لەم نرخەی ئێستا دەمێنێتەوە كە مسقاڵێك زێڕی عەیارە 21 بە 740 هەزار دینار مامەڵەی پێوە دەكرێت.
