وەزارەتی کارەبای هەرێم: بەرهەمهێنانی کارەبا کەمدەبێتەوە

SNN

وەزارەتی کارەبای هەرێم لە راگەیەنراوێکدا بڵاویکردەوە، بەهۆی چاکسازیی ساڵانەی کۆمپانیای دانەغاز، بڕی بەرهەمهێنانی وێستگەکانی کارەبا کەمدەبێتەوە، دەڵێت “ئەم کارە سێ رۆژ دەخایەنێت”.

ئەمڕۆ شەممە 20ی ئەیلوول، وەزارەتی کارەبای حکومەتی هەرێمی کوردستان لە راگەیەندراوێکدا ئاشکرایکرد، کۆمپانیای دانەغاز لە رۆژانی 20-21-22ی ئەم مانگەوە دەست بە چاکسازیی ساڵانەی خۆی لە پرۆسەی بەرهەمهێنانی غاز دەکات، بەو هۆیەشەوە بڕی 300 ملیۆن پێ سێجا بەرهەمهێنانی غاز کەمدەبێتەوە.

ئاماژە بەوەکراوە، بەهۆی ئەو چاکسازییەوە کە ماوەی سێ رۆژ دەخایەنێت توانای بەرهەمهێنانی وێستگەکانی کارەبا زیاتر لە 1600 مێگاوات كارەبا کەمدەبێتەوە.

جەختیکردووەتەوە، لەگەڵ وەزارەتی سامانە سروشتییەکان لەسەر هێڵ دەبن بۆ کۆنترۆڵکردن و کەمکردنەوەی کاریگەرییەکانی پرۆسەکە لەسەر بەشداربووانی کارەبا.