“رێککەوتن کراوە و هیچ مووچەیەک نافەوتێت”
مووچە بودجە
SNN-
بەگوێرەی زانیارییەکان، رێککەوتنی کۆتایی لەنێوان هەرێمی کوردستان و حکومەتی عێراق کراوە، کە تیایدا جەخت لەسەر نەفەوتاندنی مووچەی مانگەکانی داهاتوو کراوەتەوە، ئەمەش بە مەرجێکی سەرەکی بۆ هەر رێککەوتنێکی نەوتی دانراوە.
ئەندامێکی شاندی دانوستانکاری حکومەتی هەرێمی کوردستان راگەیاند، “لە کۆبوونەوەکاندا و لە کاتی گفتوگۆکردن لەسەر رێککەوتنی نەوت، هەموو رێککەوتنەکە بەو شێوەیە کراوە کە مەرجی سەرەتا و کۆتایی ئەوان نەفەوتاندنی مووچەکان بووە و ئەوەیان کردووەتە مەرج کە مووچەی مانگەکان وەک خۆی بێت.”
ئاماژەی بەوەشکردووە، ” حکومەت لە کاتی ناردنی مووچە ناوی مانگەکانی هێناوە و وەک ساڵانەی رابردووی نەکردووە، کە ناوی مانگەکەی نەدەهێنا تاوەکو بە کۆی گشتی لە کۆتایی ساڵدا لە تەرازووی پێداچوونەوەدا بڵێت بڕی ئەوەندە پارە بۆ هەرێمی کوردستان بۆ خەرجی مووچە چووە و بەرپرسیارێتیی یاسایی نەیەتە سەری.”
ئەمەش لە کاتێکدایە، لە هەرێم بۆ ئەمساڵ تاوەکو ئێستا شەش مووچە دابەشکراوە، مووچەی مانگی تەممووزیش لە کۆبوونەوەی دوێنێی ئەنجوومەنی وەزیرانی عێراقدا بڕیاری ناردنی دراوە.
