پزیشکیان : ئێمە نامانەوێت چەکی ئەتۆمی دروست بکەین

SNN-

مەسعود پزیشکیان، سەرۆککۆماری ئێران لە وتارێکیدا لە کۆبوونەوەکانی کۆمەڵەی گشتیی نەتەوە یەکگرتووەکان، هێرشێکی کردە سەر ئیسرائیل و بە ئەنجامدانی کۆمەڵکوژی لە غەززە و پێشێلکردنی سەروەریی وڵاتانی ناوچەکە تۆمەتباری کرد. هاوکات جەختیشی کردەوە کە وڵاتەکەی بەدوای بەدەستهێنانی چەکی ئەتۆمییەوە نییە.

تۆمەتبارکردنی ئیسرائیل بە تاوانی جەنگ و تیرۆر

پزیشکیان ڕایگەیاند کە لە ماوەی دوو ساڵی ڕابردوودا، ئیسرائیل کۆمەڵکوژی لە کەرتی غەززە ئەنجامداوە و بنیامین نەتانیاهۆی بە تاوانباری جەنگ ناوبرد. ئاماژەی بەوەشکرد کە ئیسرائیل چەندین زانا و سەرکردەی لە ناوچەکەدا تیرۆر کردووە و ئەم کارەی بە پێشێلکاریی یاسا نێودەوڵەتییەکان لەقەڵەمدا.

پێشێلکردنی سەروەریی وڵاتان

سەرۆککۆماری ئێران وتیشی”ئیسرائیل سەروەریی لوبنان، سووریا، یەمەن و ئێرانی پێشێلکردووە،” و هێرشی ئیسرائیل و ئەمریکای بۆ سەر ئێران بە “خیانەت لە دیپلۆماسییەت” وەسف کرد.

بەرنامەی ئەتۆمی و یەکڕیزیی ناوخۆیی

پزیشکیان دووپاتیکردەوە کە کۆماری ئیسلامیی ئێران نامەوێت چەکی ئەتۆمی دروست بکات. لە کۆتاییشدا جەختیکردەوە کە “ئیسرائیل و دوژمنەکانمان نەیانتوانی جیاوازی و ناکۆکی بخەنە نێوان گەلی ئێرانەوە”.